भीषण आँधीले मध्यपश्चिम अमेरिकामा सात जनाको ज्यान लियो, लाखौँ बिना बिजुली
न्युयोर्क- अमेरिकाको मध्यपश्चिम क्षेत्रमा आएको भीषण हिउँदे आँधीका कारण कम्तीमा सात जनाको मृत्यु भएको छ भने लाखौँ मानिसहरू बिजुलीविहीन बनेका छन्। आइतबार रातिदेखि सुरू भएको शक्तिशाली हावाहुरी, भारी वर्षा र हिमपातले मिड-अटलान्टिकदेखि दक्षिणी क्षेत्रसम्म व्यापक क्षति पुर्याएको छ।
आँधीका कारण मिशिगनमा चार, इन्डियानामा दुई र ओक्लाहोमामा एकजनाको मृत्यु भएको छ। लुइसियानाको सेन्ट ल्याण्ड्री पेरिशमा आएको EF-2 श्रेणीको टोरनाडोले घरको छाना उडाए पनि कुनै घाइते भएको छैन।
मिशिगनको कालामाजु काउन्टीमा एउटै परिवारका तीन जनाको मृत्यु भयो जब भीषण आँधीले ठूलो रुख सवारीसाधनमाथि खसाल्यो। घटनामा तीन जना घाइते भएका छन्, जसमध्ये एक जनाको अवस्था गम्भीर रहेको छ। इनघम काउन्टीमा ५८ वर्षीय एक पुरुषको घरमाथि रुख खस्दा ज्यान गएको छ।
इन्डियानाको पोर्टर काउन्टीमा ३४ वर्षीय जगबीर सिंहको मृत्यु भयो जब ८० माइल प्रति घण्टाको गतिमा आएको हावाहुरीले उनको सेमिट्रक पल्टायो। मिलर्सबर्गमा आएको तेज हावाले एउटा अमिश बग्गी पल्टाउँदा एक व्यक्तिको मृत्यु भएको छ। ओक्लाहोमाको चेरोकी काउन्टीमा एउटा क्याम्परमाथि रुख खस्दा एक व्यक्तिको ज्यान गएको छ।
एल्खार्ट, इन्डियानामा पनि आँधीले ठूलो क्षति पुर्याएको छ। स्थानीय प्रशासनका अनुसार त्यहाँ एउटा भवन पूरै ढलेको छ भने अन्य धेरै संरचनामा क्षति पुगेको छ। प्रहरी अधिकारीहरूले मानिसहरूलाई अनावश्यक रूपमा बाहिर ननिस्कन आग्रह गरेका छन्।
विद्युत् प्रणालीमा पनि आँधीले ठुलो असर पार्दै लाखौँ मानिसहरूलाई बिजुलीविहीन बनाएको छ। मिशिगनमा मात्रै झन्डै तीन लाख मानिस बिजुलीविहीन बनेका छन् भने विस्कन्सिन र इन्डियानामा पनि ५० हजारभन्दा बढी घरधनी तथा व्यवसायहरू प्रभावित भएका छन्।
मिशिगन राज्यकी गभर्नर ग्रेटचेन ह्विटमरले १० काउन्टीमा आपतकालीन अवस्था घोषणा गर्दै प्रभावित क्षेत्रका जनतालाई सतर्क रहन आग्रह गरेकी छन्।
यसैबीच, मौसम विभागले अमेरिकाको पश्चिमी तटीय क्षेत्रमा अर्को शक्तिशाली आँधी आउन सक्ने चेतावनी दिएको छ। क्यालिफोर्निया र ओरेगनमा ७० माइल प्रति घण्टाको गतिमा हावा चल्ने अनुमान गरिएको छ भने पर्वतीय क्षेत्रमा २ देखि ४ फिटसम्म हिउँ पर्ने सम्भावना रहेको छ।
मौसमविद्हरूका अनुसार आँधी आगामी दिनमा पूर्वतर्फ सर्ने सम्भावना रहेको छ। मिसिसिपी उपत्यकामा यसको असर देखिन सक्ने भएकाले स्थानीय प्रशासनले सतर्कता अपनाउन आग्रह गरेको छ।
