न्यू जर्सीको वाइल्डवुडमा बाल यौन दुर्व्यवहार आरोपमा एक व्यक्ति पक्राउ
न्युयोर्क- न्यू जर्सीको वाइल्डवुड निवासी ३७ वर्षीय जोसे एन्तोनियो एन्जेलेस-अयाला बाल यौन दुर्व्यवहारसम्बन्धी अनुसन्धानको क्रममा पक्राउ परेका छन्। केप मे काउन्टी अभियोजन कार्यालयले उक्त जानकारी दिएको हो।
अधिकारिहरूका अनुसार, एन्जेलेस-अयालामाथि पहिलो श्रेणीको दुईवटा गम्भीर यौन दुर्व्यवहार, दोस्रो श्रेणीको दुईवटा यौन दुर्व्यवहार, र दोस्रो श्रेणीको दुईवटा बाल सुरक्षासम्बन्धी मुद्दा लगाइएको छ।
केप मे काउन्टी अभियोजन कार्यालयको विशेष पीडित इकाईले वाइल्डवुड प्रहरी विभाग तथा केप मे सिटी प्रहरी विभागसँगको सहकार्यमा १ अप्रिल २०२५ मा अनुसन्धान सुरु गरेको थियो। प्रारम्भिक रिपोर्टअनुसार, एन्जेलेस-अयालाले एक बालकलाई पटक–पटक यौन दुर्व्यवहार गरेको आरोप लागेको छ।
अनुसन्धानका क्रममा वाइल्डवुडस्थित पूर्व लिङ्कन एभेन्यूको १०० ब्लकमा अदालतबाट अनुमति प्राप्त खोजी वारन्ट कार्यान्वयन गरिएको थियो। यस क्रममा थुप्रै मोबाइल फोन तथा अन्य इलेक्ट्रोनिक उपकरण जफत गरिएको बताइएको छ। सोही दिन एन्जेलेस-अयालालाई पक्राउ गरिएको थियो।
हाल उनी केप मे काउन्टी सुधार केन्द्रमा थुनामा रहेका छन् र आगामी अदालत प्रक्रिया कुर्दै छन्।
यदि पहिलो श्रेणीका अभियोगमा दोषी ठहरिए, उनलाई १० देखि २० वर्षसम्मको जेल सजाय हुन सक्ने अधिकारीहरूले बताएका छन्।
“बालबालिकाको सुरक्षाका लागि हाम्रो प्रतिबद्धता दृढ छ। बाल दुरुपयोगका आरोपहरूलाई हामी गम्भीरताका साथ लिन्छौं र यस्ता अपराध गर्नेहरूलाई कानुनी दायरामा ल्याएर कडा सजाय दिलाउनेछौं,” केप मे काउन्टीका अभियोजक जेफ्री एच. सुथरल्यान्डले बताएका छन्।
