आईसीई हिरासतबाट भागेको व्यक्ति बस चढ्दै गर्दा पक्राउ

डेनभर, कोलोराडो – अमेरिकी आप्रवासन तथा सीमा सुरक्षा (ICE) हिरासतबाट पावर आउटेजको बेला भागेका दोस्रो व्यक्ति मंगलबार डेनभरमा बस चढ्दै गर्दा पक्राउ परेका छन्।

पक्राउ पर्ने व्यक्ति भेनेजुएलाका २४ वर्षीय गिलोन्ड भिडो-रोमेरो हुन्, जो डेनभरको कोलफ्याक्स एभिन्यूमा बसमा यात्रा गरिरहेका बेला फेला परेका थिए। अमेरिकी मार्शल सेवा (U.S. Marshals Service) ले उनलाई गिरफ्तार गरेको हो। अधिकारीहरूले भिडो-रोमेरोलाई कुख्यात भेनेजुएलियन आपराधिक गिरोह ‘ट्रेन डे अरागुआ’ (Tren de Aragua) सँग सम्बन्धित रहेको आशंका गरेका छन्।

भिडो-रोमेरो फेब्रुअरीमा चोरी र प्रहरीलाई अवज्ञा गरेको आरोपमा पक्राउ परेका थिए। उनलाई अमेरिकी राष्ट्रपति डोनाल्ड ट्रम्पले आपराधिक क्रियाकलापमा संलग्न आप्रवासीहरूको निष्कासन अभियानमा लक्ष्यित गिरोहको सदस्यको रूपमा चित्रित गरेका थिए।

मार्च १८ मा कोलोराडोको अरोरा सहरस्थित आईसीईको निजी रूपमा सञ्चालित हिरासत केन्द्रमा अचानक पावर आउटेज भएपछि भिडो-रोमेरो एउटा खुला ढोकाबाट निस्किएको बताइएको छ। उनले भाग्दा ३२ वर्षीय मेक्सिकन नागरिक जोएल गोन्जालेज-गोन्जालेज पनि उनको साथमा थिए। गोन्जालेज-गोन्जालेजलाई तीन दिनपछि एडम्स काउन्टीमा पक्राउ गरिएको थियो।

आईसीईले भिडो-रोमेरोलाई गत फेब्रुअरी २६ मा पार्क मेडोज मलमा चोरीको आरोपमा पक्राउ गरेको थियो। प्रहरीले उनलाई पक्राउ गर्दा उनले एउटा सेतो पफर ज्याकेट र गरगहना चोरेको आरोप लगाएको थियो, जसलाई उनले ज्याकेटकै खल्तीमा लुकाएका थिए।

अमेरिकी मार्शल सेवाले भिडो-रोमेरोलाई ट्रेन डे अरागुआ गिरोहसँग सम्बन्धित हुनसक्ने आशंका गरेको छ। उनी अरोराको अब बन्द भइसकेको एउटा अपार्टमेन्टमा बस्ने गर्थे, जुन स्थान गत वर्ष ट्रम्पको राष्ट्रपतीय अभियानको क्रममा चर्चित भएको थियो। त्यहाँ केही सशस्त्र गिरोहका सदस्यहरू अपार्टमेन्टमा प्रवेश गरेको दृश्य सामाजिक सञ्जालमा भाइरल भएको थियो।

डिसेम्बर महिनामा सोही गिरोहका सदस्यहरूले दुई व्यक्तिलाई अपहरण गरी कुटपिट गरेको आरोप लागेको थियो।

हाल भिडो-रोमेरोमाथि थप कानुनी कारबाही अघि बढ्ने बताइएको छ। अमेरिकी अधिकारीहरूले उनीमाथि आपराधिक गिरोहसँगको सम्बन्धबारे थप अनुसन्धान गरिरहेका छन्।