न्यूयोर्कका मेयर एरिक एडम्स स्वतन्त्र उम्मेदवार बनेर पुनः निर्वाचनमा
न्यूयोर्क- न्यूयोर्क सिटीका मेयर एरिक एडम्सले डेमोक्रेटिक प्राइमरीबाट हटेर स्वतन्त्र उम्मेदवारको रूपमा पुनः निर्वाचन लड्ने घोषणा गरेका छन्। हालै उनको भ्रष्टाचारसम्बन्धी मुद्दा खारेज भएपछि उनले यसलाई “राजनीतिक विचलन” भन्दै स्वतन्त्र रूपमा उम्मेदवारी दिने निर्णय गरेका हुन्।
एडम्सले भने, “म न्यूयोर्कको नेतृत्व राजनीतिक चरमपन्थीहरूको प्रभावभन्दा बाहिरबाट गर्न चाहन्छु।” उनले आफ्नो अभियानलाई पार्टीभन्दा माथि राख्दै “स्वतन्त्र नेतृत्व” आवश्यक रहेको बताए।
यो घोषणाले न्यूयोर्कको मेयरको दौडमा नयाँ मोड ल्याएको छ, जहाँ अब पूर्व गभर्नर एन्ड्र्यू कुओमो डेमोक्रेटिक उम्मेदवारको रूपमा प्रमुख प्रतिद्वन्द्वी हुने देखिन्छन्।
एडम्सले सन् २०२१ मा केन्द्र-वामपन्थी उम्मेदवारका रूपमा मेयरको चुनाव जितेका थिए। तर, सेप्टेम्बरमा उनीविरुद्ध भ्रष्टाचारको आरोप लागेको थियो। पछि ट्रम्प प्रशासनसँग उनको सम्बन्ध नजिकिँदै गएपछि वाशिंगटनस्थित अधिकारीहरूले मुद्दा खारेज गरेका थिए।
हाल सर्वेक्षणहरूमा कुओमोको लोकप्रियता एडम्सभन्दा बढी देखिएको छ। यद्यपि, एडम्सले आफू “८.३ मिलियन न्यूयोर्कवासीप्रति मात्र उत्तरदायी” रहेको बताउँदै पुनः मेयर बन्ने दाबी गरेका छन्।
