टेक्सासबाट १७४ आपराधिक आप्रवासीको निष्कासन, एक व्यक्तिले ३९ पटक गैरकानुनी प्रवेश गरेको खुलासा

टेक्सास-  अमेरिकी अध्यागमन तथा भन्सार प्रवर्तन (ICE) ले टेक्सासमा अवैध आप्रवासनविरुद्धको दुई हप्ते अभियानमा १७४ आपराधिक आप्रवासीलाई पक्राउ गरी मेक्सिको पठाएको जनाएको छ।

ICE ह्युस्टनका अनुसार पक्राउ परेकाहरूमा दुई जना हत्या आरोपमा दोषी ठहर भइसकेका थिए, भने एक मेक्सिकन नागरिक जुलियन एस्ट्राडा-गार्सियाले ३९ पटक गैरकानुनी रूपमा अमेरिका प्रवेश गरेको खुलासा भएको छ।

मार्च १७ देखि मार्च २८ सम्म सञ्चालन भएको यो अभियानमा पक्राउ परेकाहरू मध्ये २४ जना ग्याङ सदस्य थिए। तिनीहरूमाथि ६१० आपराधिक सजाय लगाइएका थिए, जसमा चार जना बलात्कार तथा यौन दुर्व्यवहारका दोषी र पाँच जना बाल यौन अपराधमा दोषी थिए। अन्य गम्भीर अपराधमा मदिरा सेवन गरी सवारी चलाउने १४६ जना, आक्रमण तथा कुटपिटका ७२ जना, मानव तस्करी, लागुऔषध तस्करी, हिट एन्ड रनलगायतका अभियोग समावेश थिए।

ICE अधिकारी ब्रेट ब्राडफोर्डले टेक्सासका निर्दोष नागरिकहरूलाई बचाउन एजेन्टहरूले दैनिक रूपमा आफ्नो ज्यानको बाजी लगाएर काम गरिरहेको बताए। यो पछिल्लो अपरेशनअघि मात्र, एक हप्ते अभियानमा ५४३ आपराधिक आप्रवासी पक्राउ परिसकेका थिए।

हालै निष्कासित आपराधिक आप्रवासीहरूमध्ये धेरैले अमेरिका पटक–पटक अवैध रूपमा छिरेका थिए। एक ३६ वर्षीय मेक्सिकन नागरिक ३९ पटक अमेरिका प्रवेश गरी चार पटक गैरकानुनी प्रवेशको दोषी ठहर भइसकेको थियो। एक ४८ वर्षीय मेक्सिकन नागरिक १३ पटक निष्कासन भइसकेका थिए, जसका नाममा २५ आपराधिक सजाय थिए। त्यस्तै, फ्लोरेन्सिया १३ ग्याङका एक ५० वर्षीय सदस्यलाई आठ पटक निष्कासन गरिसकिएको थियो।

ट्रम्प प्रशासनले दोस्रो कार्यकाल सुरु गरेयता मात्र १० हप्तामा १ लाखभन्दा बढी अवैध आप्रवासीलाई निष्कासन गरिसकेको छ, जुन ट्रम्पको इतिहासकै ठूलो देशभित्रको निर्वासन अभियान बनाउने लक्ष्यअनुसार अगाडि बढिरहेको छ।