गैरआवासीय नेपाली नागरिकता छिट्टै कार्यान्वयनमा – नेता रमेश रिजाल

न्यूयोर्क- नेपाली कांग्रेसका केन्द्रीय सदस्य, पूर्वमन्त्री तथा संघीय सांसद रमेश रिजालले गैरआवासीय नेपाली (NRN) नागरिकताको कार्यान्वयन अब अन्तिम चरणमा पुगेको बताएका छन्। न्यूयोर्कमा आयोजित एक कार्यक्रमहरूमा सहभागी हुँदै उनले संविधानमा उल्लेख गरिएअनुसार प्रवासी नेपालीहरूलाई ढिला नगरी नागरिकता उपलब्ध गराउनुपर्नेमा जोड दिए।

लङ आइल्यान्डमा आयोजित कार्यक्रममा प्रमुख अतिथि रिजालले, “एक पटकको नेपाली सधैंको नेपाली” भन्दै प्रवासी नेपालीको योगदानको उच्च सराहना गरे। उनले नागरिकता दिन ढिलाइ हुनुमा एनआरएनएभित्रको आन्तरिक विवाद पनि एक कारण भएको बताए।

कार्यक्रमको सभापतित्व जनसम्पर्क समिति लङ आइल्यान्ड शाखाका सभापति विश्वराज वास्तोलाले गर्दै प्रवासीहरूमा नागरिकता कार्यान्वयनप्रति गम्भीर असन्तुष्टि रहेको बताए। उनले अमेरिकाको जनसम्पर्क समितिको निर्वाचन नभएकोप्रति पनि चिन्ता व्यक्त गरे। कार्यक्रमको सञ्चालन महेश खड्काले गरेका थिए।

कार्यक्रममा नेपाली जनसम्पर्क समिति अमेरिका, एनआरएनए अमेरिका, कास्की समाज, धादिङ नेपाली समाज लगायतका विभिन्न संघसंस्थाका प्रतिनिधिहरूको उल्लेखनीय उपस्थिति थियो। सबैले गैर आवासीय नेपाली नागरिकताको कार्यान्वयन र प्रवासी नेपालीहरूको हितमा समर्पित प्रयास गर्न जोड दिए।

CCNCUSA को आयोजनामा टाउन अफ ओयस्टर बेमा सम्पन्न कार्यक्रममा नेता रिजाललाई नेपाली समुदायको योगदानप्रति सम्मान गरियो। टाउनका अधिकारीहरूले नेपालको सामाजिक-आर्थिक समृद्धिमा प्रवासीको भूमिकालाई सकारात्मक रूपमा लिएर भविष्यमा अझ सहकार्य गर्ने प्रतिबद्धता व्यक्त गरे।

अमेरिकी राष्ट्रपति थियोडोर रुजवेल्टको ऐतिहासिक निवास Sagamore Hill को भ्रमण गर्दै नेता रिजाल र उनकी धर्मपत्नी शोभा शर्माले अमेरिकी इतिहास र नेतृत्वप्रतिको सरोकार व्यक्त गरे।

अमेरिकामा बसोबास गर्ने नेपालीहरूको संख्या बढेसँगै उनीहरूको योगदान पनि उल्लेखनीय हुँदै गएको छ। प्रवासी नेपालीहरूको सशक्तीकरण, पहिचान र योगदानलाई मान्यता दिँदै नेपाल र विदेशमा रहेका नेपालीबीचको सम्बन्धलाई अझ सुदृढ बनाउने यस्ता कार्यक्रमहरू प्रेरणादायी र आवश्यक देखिएका छन्।