ट्रम्प र मस्कविरुद्ध ‘ह्याण्ड्स अफ!’ प्रदर्शनमा हजारौं न्यूयोर्क सिटीमा उत्रिए
न्युयोर्क- अमेरिकाका पूर्वराष्ट्रपति डोनाल्ड ट्रम्प र अर्बपति एलन मस्कविरुद्ध शनिबार ‘ह्याण्ड्स अफ!’ भन्ने नारासहित देशव्यापी रूपमा व्यापक विरोध प्रदर्शनहरू भए। प्रदर्शनकारीहरूले सरकार सानो बनाउने कदम, अर्थतन्त्र, मानवअधिकार तथा अन्य विषयमा ट्रम्प प्रशासनका नीतिको विरोध गरेका थिए।
अमेरिकाभर १५० भन्दा बढी समूहहरूले आयोजना गरेको करिब १,२०० भन्दा बढी प्रदर्शनहरूमा नागरिक अधिकार समूहहरू, श्रमिक यूनियन, LGBTQ+ अभियानकर्ता, पूर्वसैनिक तथा निर्वाचन अधिकारकर्मीहरू सहभागी भए। प्रदर्शन स्थलहरूमा वासिङ्टन डी.सी.को नेशनल मोलदेखि सबै ५० राज्यका क्यापिटलहरू समेटिएका थिए।
न्यूयोर्क सिटीमा आयोजकहरूले हजारौंको उपस्थिति अपेक्षा गरेका थिए। ब्रायन्ट पार्कमा भेला भएर म्याडिसन स्क्वायर पार्कतर्फ मार्च गरिएको थियो।
प्रदर्शनकारीहरूले ट्रम्प प्रशासनले हजारौं संघीय कर्मचारीहरूलाई बर्खास्त गर्नु, सामाजिक सुरक्षा कार्यालयहरू बन्द गर्नु, सरकारी निकायहरूलाई निष्क्रिय बनाउनु, आप्रवासीहरूलाई देश निकाला गर्नु, ट्रान्सजेन्डर समुदायमाथिको संरक्षण घटाउनु, तथा स्वास्थ्य कार्यक्रमको संघीय बजेट कटौती गर्नुजस्ता नीतिहरूको तीव्र आलोचना गरे।
टेस्ला, स्पेसएक्स र सामाजिक सञ्जाल X का मालिक मस्क, जो अहिले ‘सरकारी कार्यक्षमता विभाग’ (Department of Government Efficiency) का प्रमुख छन्, सरकारले खर्च कटौतीमा भूमिका खेलेका छन्। उनले करदाताको अर्बौं डलर बचत भएको दाबी गरेका छन्।
वासिङ्टन डी.सी.मा आयोजित प्रदर्शनमा मानवअधिकार अभियानी संगठन ‘ह्युमन राइट्स क्याम्पेन’ की अध्यक्ष केली रोबिन्सनले ट्रम्प प्रशासनद्वारा LGBTQ+ समुदायमाथि गरिएका आक्रमणहरूको विरोध गरिन्।
“हामीमाथि भइरहेको आक्रमण केवल राजनीतिक होइन, व्यक्तिगत पनि हो,” उनले भनिन्। “उनीहरू हाम्रो किताबमाथि प्रतिबन्ध लगाउन खोजिरहेका छन्, HIV रोकथामको बजेट घटाइरहेका छन्, हाम्रा डाक्टर, शिक्षक, परिवार र जीवनलाई अपराधीकरण गरिरहेका छन्। यो ट्रम्पको अमेरिका हो, तर हामी यस्तो अमेरिका चाहँदैनौं। हामी सबैका लागि मर्यादा, सुरक्षाबोध र स्वतन्त्रता हुने अमेरिका चाहन्छौं।”
मैसाचुसेट्सको बस्टन कमनमा पनि हजारौं प्रदर्शनकारीहरूले “हाम्रो लोकतन्त्रमाथि हात नहाल”, “सामाजिक सुरक्षामाथि हात नहाल” र “विविधता, समावेशिता र समानताले अमेरिका बलियो बनाउँछ — हात नहाल!” भन्ने नारा लेखिएका प्लेकार्ड बोकेका थिए।
Thousands out in Portland ME demanding Trump + the GOP get their #HandsOff our social services, our democracy, + our climate!
Speaker after speaker demanding Dems step up w/ a bold + positive vision to stop the brutal attacks on working people + take back power. #HandsOff2025 pic.twitter.com/8YbDzt22ZL
— Collin Rees (@collinrees) April 5, 2025
ओहायोको कोलम्बस सहरमा वर्षासँगै सयौं प्रदर्शनकारीले स्टेटहाउस अगाडि जुलुस निकाले। ६६ वर्षीय रोजर ब्रूमले भने, “म पहिले रोनाल्ड रेगन समर्थक थिएँ, तर ट्रम्पले देश टुक्र्याइरहेका छन्। यो प्रशासन त केवल गुनासोहरूको थुप्रो हो।”
फ्लोरिडाको पाम बिच गार्डेन्समा पनि सयौं मानिसहरूले ट्रम्पको गोल्फ क्लब नजिकै विरोध प्रदर्शन गरे। प्रदर्शनकारीहरूले सडकका दुबै छेउमा उभिएर गाडीहरूलाई हर्न बजाउन आग्रह गर्दै विरोध नाराहरू लगाएका थिए।
पोर्ट सेन्ट लुसीका आर्चर मोरनले भने, “हाम्रो सामाजिक सुरक्षामाथि उनीहरूले हात हाल्न हुँदैन।” उनले थपे, “हात हाल्न नहुने कुराहरूको सूची धेरै लामो छ। र ट्रम्पले पद सम्हालेको केही समयमै यति ठूलो विरोध हुनु अचम्मको कुरा हो।”
ह्वाइट हाउसले भने, “राष्ट्रपति ट्रम्पले सामाजिक सुरक्षा, मेडिकेयर र मेडिकेड लाभहरू योग्य नागरिकहरूलाई जोगाउने प्रतिबद्धता व्यक्त गरेका छन्। डेमोक्र्याटहरू चाहिँ ती सुविधाहरू गैरकानुनी आप्रवासीहरूलाई दिन खोजिरहेका छन्, जसले ती कार्यक्रमहरूलाई दिवालिया बनाउने खतरा छ।”
यसअघि पनि ट्रम्प र मस्कविरुद्ध धेरै पटक देशव्यापी प्रदर्शनहरू भएका छन्, तर सन् २०१७ को वुमेन्स मार्च वा २०२० को जर्ज फ्लोयडको हत्या पछिको ब्ल्याक लाइभ्स म्याटर जस्तो ठूला जनसङ्ख्यात्मक प्रदर्शन भने भएका छैनन्।
नर्थ क्यारोलिनाको चार्लोटमा प्रदर्शनमा सहभागीहरूले सामाजिक सुरक्षा, शिक्षा, आप्रवासन, र महिला प्रजनन अधिकारजस्ता विषयहरूमा समर्थन जनाए। ३५ वर्षीया ब्रिट कास्टिलोले भनिन्, “तपाईं जुनसुकै पार्टीकाे होस्, तपाईंले जसलाई भोट गर्नुभयो, अहिले भइरहेको अवस्था अत्यन्तै निन्दनीय छ। प्रशासनले जुन तरिकाले समस्या समाधान गर्न खोजिरहेको छ, त्यो तरिका होइन। उनीहरूले जनताको आवाज सुन्दै छैनन्।”
“उनीहरू केवल आफू र आफ्ना धनी साथीहरूका लागि सुरक्षा जाल बनाउँदैछन्, बाँकी हामीजस्ता सर्वसाधारण नागरिक भने पिँधमा किचिँदै गएका छौं,” उनले भनिन्।
