न्यूयोर्क सिटीले आप्रवासी सहयोग फिर्ता गर्न खोजेको भन्दै ट्रम्प विरुद्ध मुद्दा हाल्ने

न्यूयोर्क – न्यूयोर्क सिटीले आप्रवासीहरूको आश्रय व्यवस्थापनका लागि विनियोजित गरिएको १८८ मिलियन डलर रकम फिर्ता गर्न खोजेकोमा राष्ट्रपति डोनाल्ड ट्रम्पको प्रशासनविरुद्ध मंगलवार मुद्दा दर्ता गर्ने तयारी गरेको छ।

संघीय आपतकालीन व्यवस्थापन एजेन्सीले अप्रिल १ मा सहरलाई पत्र पठाउँदै, आप्रवासीहरूको लागि बनाइएको Shelter and Services Program अन्तर्गत प्रदान गरिएका तीनवटा अनुदान रद्द गर्ने निर्णयको जानकारी गराएको थियो। यी तीन अनुदानको कुल रकम १८८ मिलियन डलर हो।

FEMA का कार्यवाहक निर्देशक क्यामरन ह्यामिल्टनले उक्त पत्रमा लेखेका छन् कि यो कार्यक्रम ट्रम्प प्रशासनको प्राथमिकतासँग मेल खाँदैन, र “यी सेवाहरू पाउने धेरै व्यक्तिहरू अमेरिका भित्र अवैध रूपमा रहेको पाइन्छ।”

ट्रम्प प्रशासनको दाबी अनुसार उक्त अनुदान अवैध आप्रवासनको समर्थनमा खर्च गरिएको हो। तर सहरका अनुसार यो संघीय संसदबाट पारित र FEMA मार्फत कार्यान्वयन गरिने कार्यक्रम हो, जसले स्थानीय सरकार र गैरसरकारी संस्थाहरूलाई आप्रवासीहरूका लागि आश्रय र अन्य सामाजिक सेवा प्रदान गर्न सहयोग गर्छ।

महानगरपालिकाका मेयर एरिक एडम्सले भने, “हामीले यो सङ्कट सिर्जना गरेका होइनौं — दशकौंदेखिको संघीय असफलता र आप्रवासन सुधारको अभावले यो अवस्था ल्याएको हो।”

एडम्स प्रशासनले यसअघि पनि ८० मिलियन डलर फिर्ता गरिएको विषयमा फेब्रुअरीमा मुद्दा दर्ता गरिसकेको थियो। अहिले पुनः १०६ मिलियन डलर फिर्ता गर्नुपर्ने अवस्था आएसँगै यो मुद्दा अलग रूपमा दर्ता गरिने कि एउटै मुद्दामा समेटिने भन्ने स्पष्ट भइसकेको छैन।

सहरले आप्रवासीहरूको बढ्दो आगमन व्यवस्थापन गर्न होटलहरू र खाली भवनहरू भाडामा लिएको थियो, जसमध्ये म्यानह्याटनको ऐतिहासिक रोसाभेल्ट होटल एक हो। यस भवनलाई आश्रय र सामाजिक सेवा दर्ता केन्द्र बनाइएको थियो।

तर, रिपब्लिकन नेताहरू र संघीय अधिकारीहरूले उक्त भवनलाई ग्याङको सक्रियता भएको स्थान भनेर आलोचना गरे र यही आरोपलाई आधार बनाएर अनुदान रकम फिर्ता गरिएको थियो।

सहरको भनाइमा, उक्त आरोप निराधार छ। एडम्सले जून महिनासम्म रोसाभेल्टसहित ५० भन्दा बढी आप्रवासी आश्रय केन्द्रहरू बन्द गर्ने योजना रहेको बताएका छन्, किनभने नयाँ आगमन घटेको छ र आप्रवासीहरूलाई अन्य सामुदायिक आवासमा स्थानान्तरण गरिएको छ।

डेमोक्र्याट मेयर एडम्स, जो स्वतन्त्र उम्मेदवारको रूपमा पुनः चुनाव लड्ने तयारीमा छन्, ट्रम्प प्रशासनबाट आफू स्वतन्त्र रहेको देखाउन दबावमा छन्।

संघीय भ्रष्टाचार मुद्दामा न्याय मन्त्रालयले आरोप हटाउने निर्णय गरेपछि उनीमाथि ट्रम्प प्रशासनसँग साँठगाँठ भएको आशंका गरिएको थियो। उक्त मुद्दा गत हप्ता खारेज गरिएको थियो।

एडम्सले मंगलबार पत्रकार सम्मेलनमा भने, “हामी आप्रवासन नीतिमा ट्रम्प प्रशासनका केही पक्षहरूको प्रशंसा गर्छौं, तर आप्रवासी सेवामा खर्च भएको प्रत्येक पैसाको लागि हामी लड्नेछौं।”