अमेरिकाबाट हालसम्म ११४ जना नेपाली निष्कासन, १,३६५ जना अझै प्रक्रियामा

वाशिङटन डिसी — अमेरिकाले पछिल्लो समय अध्यागमन नीतिमा कडाइ गरेसँगै गैरकानुनी रूपमा बसोबास गर्दै आएका नेपाली नागरिकहरूमाथि निष्कासन प्रक्रिया तीव्र बनाएको छ। अमेरिकी अध्यागमन तथा भन्सार प्रवर्द्धन कार्यालय (ICE) का अनुसार, हालसम्म १,३६५ जना नेपाली नागरिकलाई अमेरिका छाड्न निर्देशन दिइएको छ भने तीमध्ये ११४ जना नेपालीलाई जबरजस्ती निष्कासन गरी नेपाल फर्काइएका छन्।

पछिल्लो ५६ दिनको अवधिमा मात्रै ४३ जना नेपाली अमेरिका निकाला भएका छन्। त्यसअघि सन् २०२४ मा ३३ जना, सन् २०२३ मा २४ जना, सन् २०२२ मा २२ जना, र सन् २०२१ मा ३५ जना नेपालीलाई निष्कासन गरिएको थियो।

निष्कासनमा परेका नेपालीहरूको मुख्य कारण गैरकानुनी बसोबास, अवैध प्रवेश, तथा भिसा अवधि सकिएपछि पनि बसिरहनु रहेको बताइएको छ। केही मामिलामा आपराधिक गतिविधिमा संलग्न रहेको आरोपमा पनि नेपालीहरूलाई निष्कासन गरिएको छ।

अर्कोतर्फ, हाल अमेरिका भित्र करिब ७,००० नेपाली नागरिक गैरकानुनी रूपमा बसोबास गरिरहेको अनुमान छ। साथै, टेम्पोररी प्रोटेक्टेड स्टेटस (TPS) अन्तर्गत अमेरिका बसोबास गरिरहेका करिब ९,००० नेपालीहरूको अवस्था पनि अनिश्चित बन्दै गएको छ। TPS को अवधि आगामी जुन २४, २०२५ मा सकिँदैछ, र यदि समयमै नवीकरण नभएमा उनीहरू पनि निष्कासनको जोखिममा पर्ने छन्।

नेपालस्थित मानवअधिकार तथा आप्रवासन विज्ञहरूका अनुसार, अमेरिकाबाट निष्कासनमा परेका नेपालीहरूको संख्या बढ्नु गम्भीर चिन्ताको विषय हो। उनीहरूले नेपाल सरकारलाई आप्रवासी नागरिकहरूको सुरक्षाका लागि कूटनीतिक पहल गर्न सुझाव दिएका छन्।

अहिलेसम्म नेपाल सरकारले अमेरिका सरकारसँग औपचारिक रूपमा कुनै गुनासो पेश नगरेको भए पनि, आगामी दिनमा निष्कासनमा परेका वा प्रक्रियामा रहेका नेपालीहरूको संरक्षणका लागि स्पष्ट रणनीति बनाउनु अपरिहार्य देखिन्छ।