लङ आइल्याण्डमा ढलको पानी पोखिएपछि स्वास्थ्य अधिकारीद्वारा चेतावनी जारी

पोर्ट जेफरसन हार्बर, लङ आइल्याण्ड — पोर्ट जेफरसन हार्बरमा मंगलवार हजारौं ग्यालेन आंशिक रूपमा प्रशोधित ढलको पानी पोखिएपछि स्वास्थ्य अधिकारीहरूले नागरिकहरूलाई पानीजन्य गतिविधिबाट टाढा रहन तथा शेलफिस (समुद्री जीवजन्तु) सेवन नगर्न आग्रह गरेका छन्।

सुफोक काउन्टी स्वास्थ्य सेवा विभागले दिएको जानकारी अनुसार, यूभी डिसइन्फेक्सन यन्त्रमध्ये एकमा खराबी आएपछि यो दुर्घटना भएको हो। ढलको पानी सतहको पानीमा मिसिएपछि रोग उत्पन्न गर्ने सूक्ष्म जीवाणुहरू (पाथोजेन) को उपस्थितिको सम्भावना बढेको छ।

न्यूयोर्क राज्यको वातावरण संरक्षण विभाग (DEC)ले उक्त दुर्घटनाले करिब १,६०० एकड क्षेत्रफलमा फैलिएको शेलफिस बेडहरूमा प्रभाव पारेको र जनस्वास्थ्यमा खतरा बढेकाले अर्को सूचना नभएसम्म शेलफिस संकलन पूर्ण रूपमा बन्द गरिने जनाएको छ।

“यो वसन्त ऋतु हो, प्रजननको समय हो,” नागरिक वातावरण अभियान (Citizens Campaign for the Environment) की एड्रिएन एस्पोसिटोले भनिन्। “यस समयमा विन्टर फ्लाउन्डर जस्ता माछाहरू प्रजनन गरिरहेका हुन्छन्, र घोडाको आकार भएका क्र्याबहरू (horseshoe crabs) पनि बन्दरगाह फर्किरहेका हुन्छन्।”

स्वास्थ्य सल्लाह:
– बुधबार बिहान ९ बजेसम्म पानीसँग प्रत्यक्ष सम्पर्क नगर्न सुझाव दिइएको छ।
– बालबालिका र पाल्तु जनावरलाई पनि प्रभावित क्षेत्रबाट टाढा राख्न आग्रह गरिएको छ।
– यदि आकस्मिक रूपमा पानीसँग सम्पर्क भएको खण्डमा तुरुन्तै सफा पानीले धुनुहोस्।
– सम्पर्कपछि यदि वान्ता, ज्वरो, पातलो दिसा, छालामा जलन, आँखामा वा घाटीमा जलन, एलर्जी वा सास फेर्न गाह्रो हुने जस्ता लक्षणहरू देखा परेमा तुरुन्तै चिकित्सकको सल्लाह लिनुहोस्।

स्वास्थ्य अधिकारीहरूले समस्या नियन्त्रणका लागि आवश्यक सुधारात्मक कदमहरू चालिएको जानकारी दिएका छन्। तथापि, नागरिकहरूलाई सतर्कता अपनाउन कडाइका साथ आग्रह गरिएको छ।