श्रम बोर्डमा साइबर सुरक्षा भंगको आरोप, ट्रम्पको DOGE संलग्न भएको दाबी

वासिङटन- अमेरिकाको राष्ट्रिय श्रम सम्बन्ध बोर्ड (NLRB) मा संवेदनशील डेटा चुहावट भएको आरोप लगाउँदै संघीय साइबर सुरक्षा विज्ञ ड्यानियल बेरुलिसले गम्भीर आरोप सार्वजनिक गरेका छन्। उनले राष्ट्रपति डोनाल्ड ट्रम्पको प्रशासन अन्तर्गत रहेको “Department of Government Efficiency (DOGE)” ले NLRB को प्रणालीमा पहुँच लिएर करिब १० गिगाबाइट डेटा अवैध रूपमा स्थानान्तरण गरेको बताएका छन्।

बेरुलिसले कसम खाएर दिएका गोप्य विवरणमा DOGE का इन्जिनियरहरूले मल्टिफ्याक्टर प्रमाणीकरण प्रणालीमा हस्तक्षेप गरेको, आन्तरिक सुरक्षा अलार्म बन्द गरेको र विदेशी स्थानबाट असामान्य लगइन प्रयासहरू भएको दाबी गरेका छन्। ती प्रयासमध्ये एक रूसी IP ठेगानाबाट भएको थियो, जसमा सही प्रयोगकर्ता नाम र पासवर्ड प्रयोग गरिएको देखिएको थियो।

बेरुलिसका अनुसार, डेटा ट्रान्सफरमा श्रमिक तथा नियोक्ताको व्यक्तिगत विवरण र गोप्य व्यावसायिक जानकारी समावेश थियो। उनले यसलाई “अत्यन्त अस्वाभाविक र जोखिमपूर्ण” गतिविधि भनेका छन्। साथै, DOGE ले प्रणालीमा पहुँच लिएपछि विदेशी लगइन प्रयासहरू तीव्र रूपमा बढेको पनि उनले बताए।

व्हाइट हाउसले भने DOGE को कार्य पारदर्शी रहेको र ट्रम्पको कार्यकारी आदेशअनुसार सरकारी निकायहरूमा डेटा पहुँच सुनिश्चित गरिएको दाबी गरेको छ। तर NLRB का प्रवक्ताले DOGE लाई सिस्टमको पहुँच नदिएको, र कुनै डाटा चुहावट नभएको आन्तरिक अनुसन्धानले निष्कर्ष निकालेको प्रतिक्रिया दिएका छन्।

बेरुलिसका वकिल एन्ड्रु बकाजले यो गतिविधिले सन् २०१४ को Federal Information Security Modernization Act र संघीय गोपनीयता ऐन उल्लंघन गरेको भन्दै संसदलाई पत्र लेखेका छन्। साथै, उनले बेरुलिसलाई धम्की दिइएको, उनको घरमा ड्रोनद्वारा खिचिएको तस्बिर र धम्कीपूर्ण नोट टाँसिएको दाबी गरेका छन्।

यो उजुरी सार्वजनिक भएपछि, यसबारे कानुनी र राजनीतिक तहमा छानबिन सुरु हुने सम्भावना बढेको छ।