न्यूयोर्क सिटीमा २०० भन्दा बढी अवैध आप्रवासी पक्राउ : सेक्स अपराधी, ड्रग माफिया र आपराधिक गिरोहका सदस्य समातिए

न्यूयोर्क – आप्रवासन तथा भन्सार प्रवर्तन संस्था (ICE) ले राष्ट्रपति डोनाल्ड ट्रम्पको अवैध आप्रवासन विरुद्धको कडाइ अभियान अन्तर्गत यस महिनाको सुरुमा न्यूयोर्क सिटी क्षेत्रमा ६ दिन लामो विशेष कारबाही चलाउँदै २०० भन्दा बढी अवैध आप्रवासीलाई पक्राउ गरेको छ।

ICE र अन्य कानून कार्यान्वयन निकायहरूले न्यूयोर्क सिटी र वरपरका क्षेत्रहरूमा “गम्भीर” अपराधमा संलग्न आप्रवासीहरूलाई लक्षित गर्दै यो अभियान सञ्चालन गरेका थिए।

एप्रिल ६ देखि १२ सम्मको कारबाहीमा पक्राउ परेका २०६ मध्ये आधाभन्दा बढीमा पहिले देखिएका गम्भीर आपराधिक रेकर्डहरू थिए वा तिनीहरू हत्या, आक्रमण, आगजनी, बलात्कार, लागूपदार्थ कारोबार र अवैध हतियारसँग सम्बन्धित मुद्दाहरूमा हालसमेत आरोपित छन्।

तिनीहरूमध्ये एक जना आफ्नै देशमा हत्याको अभियोगमा दोषी ठहर भइसकेका छन् भने अर्को विदेशी अभियुक्तलाई आफ्नो देशले खोजिरहेको बताइएको छ।

पक्राउ परेका केही व्यक्ति न्यूयोर्क क्षेत्रमा सक्रिय रहेका कुख्यात अन्तर्राष्ट्रिय आपराधिक गिरोहहरूसँग सम्बन्धित भएको विश्वास गरिएको छ। ती गिरोहमा एमएस–१३, ट्रेन डे अरागुआ, सुरेनोस, र १८थ स्ट्रिट गिरोह पनि समावेश छन्।

न्यूयोर्क सिटीका मेयर एरिक एडम्सले सार्वजनिक सुरक्षा सुनिश्चित गर्न कानून कार्यान्वयन निकायहरूसँग सहकार्य गर्न आफू तयार रहेको बताएका छन्।

“ICE कुनै आपराधिक संस्था होइन। ICE एउटा कानून कार्यान्वयन गर्ने संस्था हो,” उनले भने। “म सार्वजनिक सुरक्षाको लागि कानूनी निकायहरूसँग सहकार्य गर्छु।”

यस कारबाहीमा एफबीआई न्यूयोर्क, ड्रग प्रवर्तन प्रशासन (DEA), मद्य तथा हतियार नियन्त्रण ब्युरो (ATF), अमेरिकी मरीन कोर (USMC), कूटनीतिक सुरक्षा सेवा (DSS), र न्यूयोर्कको पूर्वी तथा दक्षिणी जिल्ला संघीय अटर्नी कार्यालयहरू पनि संलग्न थिए।

“ICE र हाम्रा कानून कार्यान्वयन साझेदारहरूको कडा मेहनतका कारण न्यूयोर्क अहिले थप सुरक्षित भएको छ,” ICE का कार्यवाहक निर्देशक टड लायन्सले एक विज्ञप्तिमा भने। “हामीले यो अभियानमा सबैभन्दा खतरनाक आपराधिक आप्रवासीहरूलाई लक्षित ग¥यौं र केवल एक साताभित्र २०६ जनालाई पक्राउ गर्न सफल भयौं।”