‘एक पटक चिफ, सधैँ चिफ’: ट्रम्पको समर्थनले आदिवासी मस्कट विवादमा नयाँ मोड
न्युयोर्क- राज्य र संघीय अदालतमा कानुनी लडाइँ हारिसकेपछि, न्यूयोर्कको मासापेक्वा स्कुल बोर्डले अमेरिकी राष्ट्रपति डोनाल्ड ट्रम्पसँग सहायता मागेको छ। ट्रम्पले सामाजिक सञ्जालमार्फत यस आह्वानमा प्रतिक्रिया जनाउँदै ‘चिफ’ मस्कट कायम राख्ने लडाइँमा समर्थन जनाएका छन्, जसले स्थानीय स्कूलको मामिलालाई राष्ट्रिय राजनीतिक मुद्दामा रूपान्तरण गरि दिएको छ।
सन् २०२३ मा, न्यूयोर्क राज्यको बोर्ड अफ रेजेण्ट्सले सार्वजनिक विद्यालयहरूमा आदिवासी समुदायसँग सम्बन्धित मस्कट, लोगो र चित्रहरूको प्रयोगमा प्रतिबन्ध लगाउने निर्णय गर्यो। यो नीति २०२५ जुन ३० बाट लागू हुँदैछ। राज्य शिक्षा विभागले भनेको छ कि यस किसिमका मस्कट तथा चित्रहरूले नकारात्मक रुढिवादी सोचहरूलाई प्रवर्द्धन गर्छन्, जुन बालबालिकाको मानसिक स्वास्थ्यमा हानिकारक प्रमाणित भएका छन्।
लङ्ग आइल्याण्डका १३ विद्यालय जिल्लाहरू यस नीतिको प्रभावमा परेका छन्। तीमध्ये ९ विद्यालयले यसमा सहमति जनाइसकेका छन् भने मासापेक्वा ती थोरै बाँकी रहेका विद्यालयहरूमध्ये एक हो, जसले यसको विरोध गर्दै राज्य र संघीय अदालतमा मुद्दा हालेको थियो। तर ती सबै मुद्दामा पराजित भएपछि ट्रम्पको सहयोगको आशामा उनीहरू रहेका छन्।
ट्रम्पले आफ्नो सामाजिक सञ्जाल ट्रुथ सोसियलमा यस प्रतिबन्धलाई “हास्यास्पद” र “हाम्रा महान भारतीय जनताको अपमान” भन्दै आलोचना गरे। उनले मासापेक्वा ‘चिफ्स’ को समर्थन गर्दै लेखे, “एक पटक चिफ, सधैँ चिफ।”
स्थानीय बासिन्दाहरूको प्रतिक्रिया पनि मिश्रित रहेको छ। क्याथी एनरले भने, “एक पटक चिफ, सधैँ चिफ,” यो वाक्यांश विद्यालयको पहिचानको अभिन्न अंश रहेको बताइन्। तर अर्की बासिन्दा जीनिन डेनेभले भनिन्, “म परम्परालाई बुझ्छु, तर मैले यो मस्कट आदिवासी समुदायका लागि अपमानजनक हो भनेर सुनेकी छु। म दुबै पक्ष बुझ्न सक्छु।”
स्कुल बोर्डले ट्रम्पको समर्थन प्रति उत्साह व्यक्त गर्दै एक विज्ञप्ति जारी गर्यो, जसमा भनिएको थियो, “हामी गर्वित छौं कि राष्ट्रपति ट्रम्पले हाम्रो प्रयासलाई मान्यता दिनुभएको छ। उहाँको समर्थन हाम्रो समुदायको पहिचान, परम्परा, अभिव्यक्ति स्वतन्त्रता र आदिवासीहरू प्रतिको सम्मानको पक्षमा हाम्रो लडाइँको सशक्त पुष्टि हो।”
तर, न्यूयोर्क राज्य शिक्षा विभागले कडा प्रतिक्रिया दियो। विभागले भन्यो, “यदि मासापेक्वा स्कुल बोर्डका सदस्यहरू साँच्चिकै लङ्ग आइल्याण्डको आदिवासी इतिहासको सम्मान गर्न चाहन्छन् भने, उनीहरूले यहाँ अझै बसोबास गरिरहेका आदिवासीहरूसँग संवाद गर्नुपर्छ।”
त्यस्ता आवाजहरू मध्ये एक हुन्, मासापेक्वा निवासी, पूर्व चिफ्स खेलाडी र चिकासाव नेशनका सदस्य एडम ड्रेक्सलर। उनले भने, “हेड्रेस लगाएर मैदानमा दौडिने कार्य कसरी सम्मान हो?” उनले थपे, “यो आदिवासी संस्कृतिको सम्मान होइन, यो शक्ति र राजनीति को खेल हो।”
केही स्थानीय बासिन्दाहरू ट्रम्पको समर्थनबाट उत्साहित देखिए। मेरी डेनेरोले भनिन्, “चिफ भन्नु गौरवजनक हो।” तर, अन्य केहीले ट्रम्पको संलग्नताप्रति आश्चर्य व्यक्त गरे। फिल र्याटनरले भने, “मलाई लाग्छ, राष्ट्रपति ट्रम्पसँग मासापेक्वाको मस्कट मुद्दामा बोल्नुभन्दा अरु धेरै महत्वपूर्ण कामहरू छन्।”
राज्य सरकारले विद्यालयहरूलाई स्थानिय आदिवासी नेताको सहमति पाएपछि मात्र मस्कट प्रयोग गर्न अनुमति दिने व्यवस्था राखेको छ। एनबीसी न्युयोर्कले शिन्नेकक नेशनसँग सम्पर्क गर्दा उनीहरूबाट कुनै प्रतिक्रिया प्राप्त भएको छैन।
मासापेक्वा स्कुलको मस्कट विवाद अन्ततः आर्थिक पक्षमा झुक्न सक्ने देखिन्छ। स्कुल बोर्डका अध्यक्षले मस्कट र नाम परिवर्तन गर्न एक मिलियन डलरभन्दा बढी खर्च लाग्न सक्ने बताएका छन्। यसै कारण, केहीले यस विषयलाई परम्पराको जोगावट मात्र नभई आर्थिक भारसँग पनि जोडेर हेरेका छन्।
यसरी, एउटा स्थानीय स्कुलको मस्कटको विवाद, परम्परा, संस्कृति, राजनीति र राष्ट्रिय पहिचानको बहसमा परिणत भएको छ — जसमा अब राष्ट्रपतिको आवाज पनि मिसिएको छ।
