राष्ट्रपति ट्रम्पद्वारा ऐतिहासिक जेल ‘अलकाट्राज’ पुनः सञ्चालन गर्ने घोषणा
न्युयोर्क- अमेरिकी राष्ट्रपति डोनाल्ड ट्रम्पले आइतबार एक घोषणा गर्दै बन्द गरिएको ऐतिहासिक जेल अलकाट्राजलाई पुनः सञ्चालनमा ल्याउने आदेश दिने बताएका छन्। यो जेल सान फ्रान्सिस्को खाडीको एक टापुमा अवस्थित छ।
राष्ट्रपति ट्रम्पले संघीय जेल ब्युरो, न्याय विभाग, आन्तरिक सुरक्षा विभाग र एफबीआईलाई अलकाट्राजलाई पुनः खोल्न तथा “विस्तार गर्न” निर्देशन दिने बताएका छन्।
उनले हिंसात्मक अपराध वृद्धि र आम नागरिकको सुरक्षाको आवश्यकता देखाउँदै उक्त कदम चालेको बताएका छन्। ट्रम्पले सो जेललाई “अमेरिकाका सबैभन्दा क्रूर र हिंसात्मक अपराधीहरूलाई राख्ने स्थान” बनाउने बताएका छन्।
“हामी अब अपराधी, गुण्डा र आफ्नो कर्तव्यबाट डराउने न्यायाधीशहरूको नियन्त्रणमा बस्न सक्दैनौं, जसले अवैध रूपमा हाम्रो देशमा प्रवेश गरेका अपराधीहरूलाई हटाउन दिँदैनन्,” ट्रम्पले Truth Social मा लेखेका छन्। “अलकाट्राजको पुनः सञ्चालन कानून, व्यवस्था र न्यायको प्रतीक बन्नेछ। हामी अमेरिका फेरि महान बनाउनेछौं!”
ट्रम्पले पत्रकारहरूसँग कुरा गर्दै भने, “यति धेरै अतिवादी न्यायाधीशहरू छन्, जसले प्रत्येक अवैध प्रवेशकर्ताको लागि छुट्टै मुद्दा चलाउन चाहन्छन्। त्यो भनेको लाखौं मुद्दा हुन्। यो हास्यास्पद हो। अलकाट्राज सधैं एउटा प्रतीक थियो — सायद दुःखको प्रतीक — तर अब यो कानून र व्यवस्थाको प्रतीक बन्नेछ।”
यो आदेश ट्रम्प र अदालतहरूबीच हालैको तनावको बीच आएको हो, जहाँ ट्रम्प प्रशासनले केही अभियुक्त गिरोह सदस्यहरूलाई एल साल्भाडोरको जेलमा पठाउन खोजेको थियो।
अलकाट्राज टापु सन् १९७२ मा नेशनल पार्क सर्भिस अन्तर्गतको गोल्डेन गेट नेशनल रिक्रिएशन एरियामा समावेश गरिएको थियो।
संघीय जेल ब्युरोका अनुसार अलकाट्राज अत्यधिक खर्चिलो भएको कारण सन् १९६३ मा बन्द गरिएको थियो। त्यतिबेला यसको मर्मत तथा सञ्चालनको लागि करिब ५० लाख डलर आवश्यक पर्ने अनुमान गरिएको थियो।
“यो रकम दैनिक सञ्चालन खर्च बाहेकको थियो — अलकाट्राज अन्य संघीय जेलको तुलनामा झण्डै तीन गुणा महँगो थियो,” ब्युरोको वेबसाइटमा लेखिएको छ।
सन् १९५९ मा अलकाट्राजमा प्रति कैदी दैनिक खर्च $१०.१० रहेको थियो।
यो जेलमा अल क्यापोन र “मेसिन गन” केली जस्ता कुख्यात अपराधीहरू राखिएका थिए। २९ वर्षको सञ्चालन अवधिमा ३६ जनाले भाग्ने प्रयास गरे पनि सबै पक्राऊ वा मृत अवस्थामा फेला परेका थिए।
हाल यो टापु पर्यटकहरूको लागि खुला छ र वार्षिक एक मिलियनभन्दा बढी पर्यटकले भ्रमण गर्ने गर्दछन्।
राष्ट्रपति ट्रम्पको घोषणापछि सेनाटर स्कट वीनर (डेमोक्र्याट–सान फ्रान्सिस्को) ले यस कदमलाई “कानूनी शासनलाई नष्ट गर्ने प्रयास” भनेका छन्।
“ट्रम्पको आदेश — एक संग्रहालय बनेको स्थानलाई पुनः जेल बनाउने भन्ने — आफैँमा हास्यास्पद छ,” वीनरले भने। “यसले संघीय आम्दानी बढाउनुका साथै थुप्रै रोजगारी पनि सिर्जना गरेको छ। यदि ट्रम्प साँच्चै गम्भीर छन् भने, यो हाम्रो लोकतन्त्र ध्वस्त पार्ने अर्को कदम हो — सान फ्रान्सिस्को खाडीको बीचमै एक घरेलु गुलाग।”
अमेरिकी प्रतिनिधिसभाकी पूर्व सभामुख न्यान्सी पेलोसीले पनि यस घोषणालाई सामाजिक सञ्जालमार्फत प्रश्न गर्दै, “यो कुनै गम्भीर घोषणा होइन,” भन्दै टिप्पणी गरेकी छन्।
क्यालिफोर्नियाका गभर्नर गेभिन न्यूसमको कार्यालयले भने, “यो वाशिङटन डी.सी. को अर्को ‘ध्यान हटाउने’ दिन हो,” भनेर प्रतिक्रिया दिएको छ।
