अवैध आप्रवासी हत्यारालाई मृत्युदण्ड दिन सकिने विधेयक संसदमा पेश
न्युयोर्क- अमेरिकामा अवैध रूपमा बसोबास गर्ने व्यक्तिहरूले हत्या गरेमा उनीहरूलाई मृत्युदण्ड वा आजीवन कारावासको सजाय दिन सकिने प्रस्तावसहित नयाँ विधेयक अमेरिकी संसदमा पेश गरिएको छ।
टेक्सास राज्यका रिपब्लिकन प्रतिनिधि मोर्गन लुटरेलले “न्यायको माग: अवैध आप्रवासी हत्याका पीडितहरूको लागि” नामक विधेयक बिहीबार पेश गरेका हुन्। उक्त विधेयकले अवैध रूपमा अमेरिकामा रहेका र प्रथम श्रेणी हत्यामा दोषी ठहर भएका व्यक्तिहरूलाई संघीय तहमा कडा सजायको दायरामा ल्याउने व्यवस्था गरेको छ।
यो विधेयकले मृत्युदण्ड खारेज भएका राज्यहरूमा समेत संघीय मुद्दाको रूपमा अभियोग चलाउन सक्ने अधिकार संघीय अभियोजकलाई दिनेछ। प्रतिनिधि लुटरेलले भने, “हामीले यस्ता अपराधीहरूलाई संघीय स्तरमा जिम्मेवार ठहर गर्न सक्छौं, किनभने उनीहरू अवैध रूपमा यहाँ छन्। त्यसैका लागि यो विधेयक ल्याएका हौं।”
लुटरेलका अनुसार यो विधेयक ल्याउनुमा प्रेरणा सन् २०२३ मा टेक्सासमा भएको एक दर्दनाक घटना हो, जहाँ पटक–पटक निष्कासित गरिएको एक अवैध आप्रवासीले पाँच जनाको हत्या गरेको थियो।
उनले भने, “उहाँ (हत्यारा) यहाँ हुनु हुँदैन थियो। उहाँलाई केहीपटक निष्कासित गरिएको थियो, तर फेरि सिमाना पार गरेर फर्किए र यस्तो भयावह घटना भयो। अब हाम्रो पालो हो यसमा कडा कदम चाल्ने।”
पूर्व राष्ट्रपति डोनाल्ड ट्रम्पले जनवरीमा हस्ताक्षर गरेको कार्यकारी आदेशले पनि गम्भीर अपराध गर्ने अवैध आप्रवासी र प्रहरी अधिकारीको हत्या गर्ने अपराधीलाई मृत्युदण्ड दिन सकिने व्यवस्था गरेको थियो, जसबाट पनि यो विधेयक प्रेरित भएको लुटरेलले बताएका छन्।
लुटरेलले केही डेमोक्र्याट सांसदहरूले पनि यस विधेयकलाई समर्थन गर्ने आशा व्यक्त गरेका छन्। “म ती संवादहरूबाट भाग्दिनँ, किनभने अमेरिकी जनताले हामी सबै मिलेर काम गरून् भन्ने चाहेका छन्,” उनले भने।
विधेयकमा लुटरेलसँगै सात जना रिपब्लिकन सांसदहरूको समर्थन रहेको छ, जसमा रिपब्लिकन स्टडी कमिटीका अध्यक्ष अगस्ट फ्लुगर पनि छन्।
