न्यूयोर्क मेयर चुनावः कुओमो पहिलोपटक प्रतिस्पर्धीहरूसँग बहसमा, प्रतिस्पर्धा चर्किंदै
न्यूयोर्क – न्यूयोर्क सिटीको मेयरका लागि डेमोक्रेटिक प्राइमरीमा अगाडि देखिएका पूर्व गभर्नर एन्ड्र्यू कुओमो अब अन्ततः अन्य प्रतिस्पर्धीहरूसँग प्रत्यक्ष बहसमा सहभागी हुँदैछन्। नौ उम्मेदवारमध्ये कुओमोले बुधबार, जुन ४ मा पहिलो पटक प्रतिस्पर्धीहरूसँग टेलिभिजन बहस गर्ने छन्।
कुओमोले प्रचार अभियानमा अरू उम्मेदवारहरूको तुलनामा कम सहभागिता देखाए पनि उनी सबैभन्दा अगाडि छन्। तर उनको अभियानले नियम उल्लंघन गरेको भन्दै नगर चुनाव वित्त बोर्डले हालसम्म १३ लाख डलर बराबरको अनुदान रोकेको छ।
यसैबीच, सिटी काउन्सिल स्पिकर एड्रिएन एडम्सले पहिलोपटक सार्वजनिक अनुदान पाउँदै २० लाख डलर प्राप्त गरेकी छन्। उनी न्यूयोर्ककी पहिलो महिला मेयर बन्ने प्रयासमा छन्। दोस्रो स्थानमा रहेका राज्य सांसद जोहरन ममदानीले एडम्सको अभियानलाई सहयोग गर्न समर्थकहरूलाई आग्रह गरेपछि प्रतिस्पर्धा झन चर्किएको छ।
वर्किङ फेमिलीज पार्टीले ममदानीलाई पहिलो रोजाइको उम्मेदवार घोषणा गरेपछि चुनावमा उनको पकड बलियो हुने अपेक्षा गरिएको छ।
