हर्टफोर्डमा अध्यागमन सुनुवाइका क्रममा हाईस्कुलका विद्यार्थी ICE द्वारा पक्राउ
कनेक्टिकट- कनेक्टिकटको म्यरिडनस्थित मालोनी हाई स्कूलका एक अन्तिम वर्षका विद्यार्थीलाई अमेरिकाको अध्यागमन तथा भन्सार प्रवर्तन विभाग (ICE) ले यस साता एक अध्यागमन सुनुवाइका क्रममा हिरासतमा लिएको छ।
विद्यालय प्रशासनका अनुसार, १२ कक्षामा अध्ययनरत ती विद्यार्थीलाई दीक्षान्त समारोहको केही दिनअघि नै, हर्टफोर्डमा रहेको अध्यागमन सुनुवाइको क्रममा पक्राउ गरिएको हो।
म्यरिडनका मेयर केभिन स्कार्पाटीले भने, “सुनुवाइ आपराधिक प्रकृतिको नभए तापनि विद्यार्थीलाई हिरासतमा लिइएको खबरले हामीलाई गम्भीर चिन्ता दिएको छ।”
म्यरिडन पब्लिक स्कुल्सका सुपरिन्टेन्डेन्ट मार्क बेनिग्नीले वक्तव्य जारी गर्दै भने, “म व्यक्तिगत विद्यार्थीबारे विवरण दिन सक्दिन, तर सबै स्नातक योग्यता पूरा गरेका विद्यार्थीहरूलाई म्यरिडन बोर्ड अफ एजुकेशनबाट डिप्लोमा प्रदान गरिनेछ भन्ने ग्यारेन्टी दिन्छु।”
विद्यालयले ICE बाट औपचारिक रूपमा कुनै सम्पर्क नआएको पनि जनाएको छ।
मेयर स्कार्पाटीका अनुसार, शहर प्रशासन विद्यार्थीका परिवारसँग सम्पर्कमा छ र संघीय प्रतिनिधिहरूसँग पनि कुरा भइरहेको छ। “यो चुनौतीपूर्ण समयमा हामी परिवारको गोपनीयताको सम्मान गर्छौं,” बेनिग्नीले थपे।
मालोनी हाई स्कूलको दीक्षान्त समारोह आउँदो मंगलबारका लागि तय गरिएको छ।
यो घटनाले अमेरिकी शिक्षालयहरूमा अध्ययनरत आप्रवासी विद्यार्थीहरूका अधिकार र अध्यागमन प्रक्रियाको मानवीय पक्षबारे गम्भीर प्रश्न उठाएको छ।
