ओमानले आइतबार अमेरिका–इरान आणविक वार्ताको आयोजना गर्ने
मस्कट- लामो समयदेखि शत्रुहरूबीच बढ्दो तनावका बीच सप्ताहन्तमा संयुक्त राज्य अमेरिका र इरानबीच छैटौँ चरणको आणविक वार्ताको आयोजना गर्ने ओमानले बिहीबार बताएको छ ।
“इरानसँगको छैटौँ चरणको अमेरिकी वार्ता यस आइतबार मस्कटमा हुने कुरा पुष्टि गर्न पाउँदा म खुसी छु”, विदेशमन्त्री बद्र अलबुसाइदीले एक्समा एक पोस्टमा भने ।
सन् २०१८ मा आफ्नो पहिलो कार्यकालमा ट्रम्पले परित्याग गरेको सन् २०१५ को सम्झौता प्रतिस्थापन गर्न नयाँ आणविक सम्झौता गर्न तेहरान र वासिङ्टनले अप्रिलदेखि पाँच चरणको वार्ता गरेका छन् ।
अमेरिकी राष्ट्रपति डोनाल्ड ट्रम्पले अमेरिकी कर्मचारीहरूलाई सम्भावित ‘खतरनाक’ मध्यपूर्वबाट सारिएको बताएको केही घण्टापछि ओमानले यो घोषणा गरेको हो ।
इजरायलले इरानी आणविक सुविधाहरूमा आक्रमण गर्न सक्ने बढ्दो अनुमानका बीच इरानलाई आणविक बम राख्न नदिने कुरा पनि ट्रम्पले दोहोर्याएका छन् ।
बुधबार इरानले द्वन्द्व फैलिएमा यस क्षेत्रमा रहेका अमेरिकी सैन्य अड्डाहरूलाई निशाना बनाउने धम्की दिएको छ ।
ट्रम्पले हालसम्म वार्ताको बारेमा आशावाद व्यक्त गरेका थिए, तर बुधबार प्रकाशित एक अन्तर्वार्तामा उनले सम्झौतामा पुग्ने बारेमा ‘कम विश्वस्त’ भएको बताए ।
जनवरीमा पदमा फर्किएपछि ट्रम्पले आणविक कूटनीतिलाई समर्थन गर्दै तर यो असफल भएमा सैन्य कारबाहीको चेतावनी दिँदै तेहरानमाथि आफ्नो ‘अधिकतम दबाब’ अभियान पुनः सुरु गरेका छन्।
अमेरिकी राष्ट्रपतिले इजरायली प्रधानमन्त्री बेन्जामिन नेतान्याहुलाई वार्ताको मौका दिन इरानको आणविक सुविधाहरूमा आक्रमण गर्न रोक्न दबाब दिएको बताएका छन्, तर बढ्दो रूपमा उनले धैर्य गुमाउँदै गरेको सङ्केत दिएका छन् ।
