न्यूयोर्क नजिकको ICE केन्द्रबाट ४ बन्दी बेपत्ता, खोजीकार्य जारी

न्यूयोर्क- न्युजर्सीको न्युआर्कस्थित डिलानी हल ICE केन्द्रबाट चार जना बन्दी हराएको घटनाको खोजी शुक्रबार दोस्रो दिन प्रवेश गरेको छ।

अमेरिकी आप्रवासन तथा भन्सार प्रवर्तन विभाग (ICE) का अनुसार, डिलानी हल मा निर्वासनको प्रक्रियामा रहेका आप्रवासीहरूलाई राखिएको छ। बिहीबार रातिदेखि ती चार जना बन्दीहरू बेपत्ता भएपछि संघीय अधिकारीहरूले उनीहरू केन्द्रभित्रै लुकेर बसेका हुन् वा भागेका हुन् भनेर अनुसन्धान गरिरहेको जनाएका छन्।

घटनापछि राज्य र स्थानीय निकायहरूलाई जानकारी गराई अतिरिक्त सुरक्षाकर्मी परिचालन गरिएको छ।

बन्दीहरूमध्ये एकको पत्नीले NBC न्यूयोर्कलाई बताउँदा उनले आफ्नो श्रीमान्ले आफूलाई फोन गरेर बन्दी कक्षमा ताला लगाइएको र ‘अमानवीय व्यवहारको विरोधमा’ आन्दोलन भइरहेको बताएका कारण केन्द्र पुगेर चासो व्यक्त गरेको बताइन्।

डिलानी हल गत मे महिनामै पनि हजार बेड भएको निजी स्वामित्वको केन्द्र भएकाले प्रदर्शनका कारण चर्चामा आएको थियो।

यही केन्द्रमा निरीक्षणका क्रममा डेमोक्र्याट सांसद लमोनीका म्याकआइभरमाथि संघीय अधिकारीमाथि आक्रमणको अभियोग लागेको छ। उनीमाथि तीन ओटा अभियोगसहित मुद्दा दर्ता गरिएको छ। सांसदहरूले कानूनअनुसार पूर्व सूचना नदिई पनि यस्ता केन्द्रमा प्रवेश गर्न पाउने अधिकार राख्छन्।

न्युअर्कका मेयर रस बाराकालाई पनि त्यही घटनामा पक्राउ गरिएको थियो जुन पछि फिर्ता लिइयो। बाराकाले अब संघीय वकिलमाथि दुराशयपूर्ण मुद्दा चलाएको भन्दै उजुरी दर्ता गरेका छन्।

मेयर बाराकाले भनेका छन्, “डिलानी हलमा खाद्यान्न नदिने, अमानवीय व्यवहार, बन्दीहरूमाथिको अत्याचार र विद्रोहसम्म भएको स्थिति चिन्ताजनक छ। निजी कारागार प्रणालीको असंविधानिक स्वरूप अब अन्त्य गर्नुपर्छ।”

घटनाले निजी कारागारहरूको निगरानी अभाव, संवैधानिक अधिकारको उल्लंघन र स्थानीय कानुनको बेवास्ता भएको संकेत गरेको भन्दै राजनीतिक र सामाजिक तहमा व्यापक बहस सुरु भएको छ।