सेन्ट्रल पार्कमा चट्याङ लागेर एक किशोर गम्भीर घाइते
न्युयोर्क — न्युयोर्क सहरको सेन्ट्रल पार्कमा बिहीवार अपराह्न चट्याङ लागेर एक किशोर गम्भीर घाइते भएका छन्। अमेरिकी मौसम विभागले दिएको आँधीबेहरीको चेतावनीबीच सो दुर्घटना भएको हो।
फायर डिपार्टमेन्ट अफ न्यूयोर्क (एफडीएनवाई) का अनुसार, अपराह्न ३:४० बजे पूर्व हार्लेमस्थित पूर्व १०१ औं स्ट्रिट र फिफ्थ एभिन्युको क्षेत्रमा एक किशोर चट्याङको चपेटामा परेका हुन्। प्रारम्भिक विवरणअनुसार ती किशोर सेन्ट्रल पार्कभित्र रुखमुनि उभिरहेका बेला रुखमा चट्याङ परेको र त्यसको प्रभाव उनीमाथि परेको बताइएको छ।
घाइते किशोरलाई तुरुन्तै उद्धार गरी कोर्नेल मेडिकल सेन्टर पुर्याइएको छ। अस्पताल स्रोतका अनुसार उनी होशमा छन् तर उनको विस्तृत अवस्था हालसम्म सार्वजनिक गरिएको छैन।
घटनाको समयमा राजधानी क्षेत्रभर गडगडाहटसहित वर्षा भइरहेको थियो। मौसमविद्हरूले उक्त समयमा बाहिर ननिस्कन र चट्याङको जोखिमबाट जोगिन सावधानी अपनाउन आग्रह गरेका थिए।
मौसम विभागले चट्याङसम्बन्धी चेतावनी दिँदै बाहिर रहेका व्यक्तिहरूलाई तुरुन्त सुरक्षित भवन वा सवारीसाधनभित्र छिर्न सल्लाह दिएको थियो। चट्याङको जोखिम हुँदा एक्लो रुखमुनि बस्न वा जलाशय नजिक रहन नहुने विज्ञहरूले बताउँदै आएका छन्।
