टेक्सासको विनाशकारी बाढी: भीषण रात जसले १२९ जनाको ज्यान लियो
टेक्सास – जुलाई ४ को रात एकाएक आएको विनाशकारी बाढीले टेक्सासको ग्वाडालूप नदी आसपासका क्षेत्रमा ठूलो जनधनको क्षति पुर्याएको छ। मध्यरातदेखि बिहान ६ बजेसम्मको समय सबैभन्दा घातक रह्यो, जहाँ बालबालिका, पर्यटक र स्थानीय बासिन्दा निद्रामा थिए, तर नदी उर्लिँदै बगिरहेको थियो।
क्याम्प मिस्टिकमा सयौं बालबालिका ग्रीष्मकालीन शिविरमा सहभागी थिए। त्यहीँकी १० वर्षीया लुसी केनेडी झ्यालमा ठोक्किने वर्षाले झस्किएर बिउँझिइन्। उनी र उनका साथीसँग मोबाइल फोन थिएन, र शिविर क्षेत्रमा सिग्नल पनि कमजोर थियो। वर्षा बढेपछि क्याम्पका कर्मचारीले बालबालिकालाई झ्यालबाट बाहिर निकालेर दोस्रो तलाको सभाहलमा पुर्याए।
यही बेला रिभर इन रिसोर्टमा बसेका युवायुवती र परिवारहरू पनि बाढीबाट प्रभावित भए। कतिपय गाडी चढेर भाग्न खोज्दा बाटोमै बगाइए। केहीले छाना चढेर जीवन बचाए। केहीलाई रातभर पानीमै उभिएर बिताउनु परेको थियो।
बाढीले Camp Mystic को बबल इन क्याबिनमा बसेका सबै ८ वर्षका बालबालिकाहरूलाई बगायो। उनीहरूलाई जोगाउने प्रयासमा क्याम्पका सञ्चालक डिक इस्टल्यान्डको पनि मृत्यु भयो। बाढीले क्याम्प, रिसोर्ट, घर, र भीआर पार्कहरू समेत पूर्णरूपमा ध्वस्त पारेको छ।
कुल १२९ जनाको मृत्यु पुष्टि भइसकेको छ भने १६६ भन्दा बढी अझै बेपत्ता छन्। मृतकमध्ये धेरैजसो बालबालिका छन्। कतिपय स्थानीय अधिकारी बाढी सुरु हुँदा अझै निद्रामा थिए, जसले जनतालाई समयमै चेतावनी दिन नसकेको आरोप लगाइएको छ।
क्यार काउन्टी शेरिफ लार्री लिथाले घटनाको पूर्ण समीक्षा गरिने बताएका छन्। तर, बाढीपूर्व नै नयाँ चेतावनी प्रणाली लागू गर्नुपर्ने योजना आर्थिक कारणले रोकिनु दुखद भएको स्थानीयले बताएका छन्।
पीडित परिवारलाई स्थानीय विद्यालय, चर्च र स्वयंसेवी संस्था मार्फत आश्रय दिइएको छ। उद्धार कार्यमा टेक्सासको राष्ट्रिय गार्ड, स्थानीय प्रहरी र स्वयंसेवक परिचालित छन्। धेरै अभिभावकहरू अझै हराइरहेका बालबालिकाको खोजीमा दिनरात एक गरिरहेका छन्।
“हामी घर गुमायौं, तर छोरी सुरक्षित भेटियो,” लुसीकी आमा विनले भनिन्, “तर धेरै आमाबुबाले त्यो खुसी भेट्न पाएनन्।”
