चाइनाटाउनमा साइकल यात्री र पैदलयात्रीलाई किचेर हत्या, दुई महिला पक्राउ
न्युयोर्क- न्युयोर्कको म्यानहाटनस्थित चाइनाटाउनमा शनिबार बिहान भएको सवारी दुर्घटनामा दुई जनाको ज्यान गएको छ। घटनामा संलग्न कार चालक र यात्रु — दुवै महिला —लाई प्रहरीले नियन्त्रणमा लिएको छ।
दुर्घटना बिहान करिब ७:३० बजे क्यानल स्ट्रिट र बाउरी नजिक, म्यानहाटन ब्रिजको छेउमा भएको हो। प्रहरीका अनुसार म्यानहाटन ब्रिजबाट तीव्र गतिमा आएको सेभ्रोले मोटर कारले पहिलोपटक एक साइकल यात्री र त्यसपछि फुटपाथमा बसिरहेकी महिलालाई ठक्कर दिएको थियो। त्यसपछि सोही कारले एक पार्किङमा राखिएको एनवाईपिडीको भ्यानलाई ठक्कर दियो, जसका कारण कार एक सुन पसलमा ठोक्किएको थियो।
एक प्रत्यक्षदर्शीका अनुसार, “कार करिब ७० माइल प्रतिघण्टाको गतिमा ब्रिजबाट ओर्लिएको थियो। तीव्र गतिमा आइपुग्नेबित्तिकै मानिसहरूलाई किचेर गयो।”
दुर्घटनापछि सडकभरि क्षतिग्रस्त सामग्रीहरू फैलिएका थिए — ढलेको रुख, उखेलिएको बेंच, र बाटोभरि छरिएका जुत्ताहरूले घटनाको भयावहता देखाउँथ्यो।
दुर्घटनापछि चालक र कारमा सवार अर्को महिला घटनास्थलबाट भागेका थिए तर करिब एक ब्लक टाढा प्रहरीले दुबैलाई पक्राउ गरेको हो। प्रहरीका अनुसार दुबै महिला करिब २० वर्ष उमेरका छन्।
स्थानीय बासिन्दा कार्लिन चानले भने, “त्यहाँ मानिसको सुरक्षाका लागि पक्की अवरोध (जर्सी बेरियर) राख्नैपर्छ।”
घटनामा ज्यान गुमाउने दुवै पीडितको नाम भने अहिलेसम्म सार्वजनिक गरिएको छैन।
