इञ्जिनमा आगलागीपछि डेल्टा एयरलाइन्सको विमानले LAX मा आपतकालीन अवतरण

लस एन्जलस— डेल्टा एयरलाइन्सको एक विमानले उडान भरेको केही समयमै इञ्जिनमा देखिएको आगलागीका कारण लस एन्जलस अन्तर्राष्ट्रिय विमानस्थल (LAX) मा आपतकालीन अवतरण गरेको छ।

जुलाई १८, शुक्रबार दिउँसो करिब २:१० बजे स्थानीय समयअनुसार डेल्टा फ्लाइट 446 ले सुरक्षित अवतरण गरेको संघीय उड्डयन प्रशासन (FAA) ले पुष्टि गरेको छ।

लस एन्जलसबाट अटलान्टाका लागि उडेको बोइङ 767-400 विमानको बायाँ इञ्जिनबाट ज्वाला निस्किरहेको दृश्य YouTube च्यानल ‘L.A. Flights’ मार्फत सार्वजनिक गरिएको छ। भिडियोमा च्यानलका सह-सञ्चालक जोशले, “ओहो! त्यो हेर्नुहोस्! यो राम्रो संकेत होइन,” भन्दै चिन्ता व्यक्त गरेका छन्।

उक्त भिडियोमा ट्याक्सी गरिरहेको विमान वरिपरि आपतकालीन सेवाका सवारीहरू देखिन्छन्।

डेल्टाका प्रवक्ताले विमानले बायाँ इञ्जिनमा समस्या देखिएपछि सावधानीका साथ LAX फर्किएको बताएका छन्। “ग्राहक र चालक दलको सुरक्षाभन्दा महत्त्वपूर्ण केही छैन। पाइलटहरूले निर्धारित प्रक्रियाअनुसार कदम चाल्दै विमान सुरक्षितरूपमा फर्काए,” डेल्टाले जारी गरेको विज्ञप्तिमा भनिएको छ।

FlightAware का अनुसार विमानले दिउँसो १:२३ मा उडान भरेको र २:०६ मा अवतरण गरेको हो।

विमानमा २ सय २६ यात्रु र ९ चालक दल सदस्य — दुई पाइलट र सात उडान सहायक — सवार थिए। सबै यात्रुहरू सामान्य रूपमा विमानबाट ओर्लन सफल भएका थिए, र तिनीहरूलाई अर्को विमानमार्फत गन्तव्यमा पठाइएको थियो।

घटनापछि स्थानीय दमकल विभाग र डेल्टाको मर्मत टोलीले विमानको निरीक्षण गरेको बताइएको छ। FAA ले घटनाको छानबिन गरिरहेको जनाएको छ।