ममता काफ्ले भट्ट प्रकरण : एक वर्ष बित्दा पनि न त न्याय, न शवको पत्तो
न्युयोर्क- अमेरिकाको भर्जिनियास्थित मनासस पार्क सहरमा एक वर्षअघि बेपत्ता भएकी नेपाली मूलकी नर्स ममता काफ्ले भट्टको प्रकरण अझैसम्म समाधानमा पुग्न सकेको छैन। ममता २०२४ जुलाई २७ मा अन्तिमपटक अस्पतालमा कार्यरत अवस्थामा देखिएकी थिइन्। त्यसपश्चात सम्पर्कविहीन बनेकी ममता काफ्लेको शव अहिलेसम्म फेला परेको छैन, यद्यपि प्रहरी अनुसन्धानले उनलाई हत्या गरिएको ठहर गर्दै उनका श्रीमान् नरेश भट्टमाथि आपराधिक अभियोग लगाएको छ।
३८ वर्षीय नरेश भट्ट २०२४ अगस्ट २२ मा पहिलोपटक पक्राउ परेका थिए। प्रारम्भमा उनीमाथि “शव लुकाएको” आरोप मात्र लगाइएको थियो, तर पछि घटनास्थलमा भेटिएका रक्तको धब्बा, सफा गरिएको कार्पेट तथा अन्य फरेन्सिक प्रमाणका आधारमा डिसेम्बर २०२४ मा उनीमाथि “प्रथम डिग्री हत्या”, “शवलाई अपवित्र गर्ने” र “शव लुकाउने” तीनवटा गम्भीर अभियोग लगाइयो। प्रहरीले ममताको रगत बेडरुम, बाथरुम र नरेशको कारमा फेला पारेको पुष्टि गरिसकेको छ।
यद्यपि ममताको शव अझै फेला परेको छैन। खोज कार्य जारी रहे पनि कुनै ठोस सफलता नजुटेको प्रहरीले जनाएको छ। नरेश भट्ट हाल पनि भर्जिनियाको प्रिन्स विलियम काउन्टी कारागारमा धरौटी बिना हिरासतमा छन्। अमेरिकी कानुनअनुसार, जबसम्म दोषी प्रमाणित हुँदैन, अभियुक्त निर्दोष मानिन्छन्।
प्रकरणलाई लिएर विभिन्न पटक सुनुवाइ तय भए पनि अझैसम्म निर्णायक प्रक्रिया अघि बढ्न सकेको छैन। सुरुवातमा २०२५ सेप्टेम्बर ८ मा ट्रायल सुरु हुने भनिएको थियो। तर अभियोजन र प्रतिरक्षा पक्षबीच प्रमाण आदानप्रदान र अनुसन्धान सामग्रीको विश्लेषणमा थप समय लाग्ने भएकाले ट्रायललाई २०२६ अक्टोबर ५ देखि नोभेम्बर १३ सम्म चल्ने गरी सारिएको छ। यसअघि सेप्टेम्बर १०, २०२६ मा पूर्व–ट्रायल सुनुवाइ तय गरिएको छ।
अप्रिल २५, २०२५ मा भएको अदालत सुनुवाइमा अभियोजन पक्षले बाह्य राज्यबाट आएका तीन साक्षीका लागि सब्पोना जारी गर्यो। त्यतिबेला हजारौं डिजिटल प्रमाणको समीक्षाका लागि समय चाहिएको भन्दै पुनः ट्रायल सार्न अनुरोध गरिएको थियो।
यसबीच, ममताका परिवार र समुदायमा निराशा चुलिएको छ। २०२५ मे २८ मा ममताको जन्मदिन पारेर आयोजित गरिएको श्रद्धाञ्जलि कार्यक्रममा उनका परिवारजन र समर्थकहरूले न्यायका लागि आवाज उठाए। कार्यक्रममा घरेलु हिंसा विरुद्धको सचेतना अभियानसमेत सञ्चालन गरिएको थियो। उनीहरूको आरोप छ — “न्याय ढिला भइरहेको छ, यो प्रक्रियागत अन्याय हो।”
ममताको सवारी साधन फेला परेको थियो, तर न उनी स्वयम् फेला परिन् न त कुनै स्पष्ट हत्यास्थल प्रमाण। यस्तो अवस्थामा ट्रायलको नतिजा के निस्कन्छ भन्ने प्रश्न अझै अनिश्चित छ। तर अभियोजन पक्षका अनुसार प्रमाणहरू पर्याप्त बलिया छन्, र अदालतमा दोष प्रमाणित गर्न सकिने विश्वास गरिएको छ।
ममता काफ्ले प्रकरणले अमेरिका लगायत अन्तर्राष्ट्रिय नेपाली समुदायमा पनि ठूलो ध्यान खिचेको छ। घर–परिवारमै हुने सम्भावित घरेलु हिंसाको गम्भीर नतिजाको प्रतिविम्ब बनेको यस घटनाले न्याय प्रणालीको गति र सुदृढता माथि पनि प्रश्न उठाएको छ।
अब सबैको नजर २०२६ को ट्रायलमाथि केन्द्रित छ, जसले ममताको परिवारलाई न्याय दिलाउने छ कि थप पीडा — समयले नै देखाउनेछ।
