क्विन्समा सडक किनारको कफी स्टलमा कार ठोक्किँदा ३ जनाको मृत्यु
न्यूयोर्क- क्विन्समा सडक किनारको कफी स्टलमा कार ठोक्किँदा मंगलबार बिहान तीन जनाको ज्यान गएको न्यूयोर्क प्रहरीले जनाएको छ।
प्रहरीका अनुसार उक्त दुर्घटना एस्टोरियाको १९औं एवेन्यु र ४२औं सडकको कुनामा बिहान करिब ८:३० बजे भएको हो। स्टल बाहिर उभिएका दुई पैदलयात्रीलाई कारले ठक्कर दिँदा घटनास्थल भयावह बनेको थियो।
घटनास्थलको हवाई दृश्यमा देखिए अनुसार सडकमा कफी स्टल र गाडीका टुक्रा–टुक्रा छरपस्ट भएका थिए। प्रत्यक्षदर्शी जियानकार्लो काउसोले भने, “अचानक ठूलो ब्रेकको आवाज आयो, म तत्काल पछाडि हटें। केही क्षणमै गाडीले मेरो छेउमा उभिएका व्यक्तिलाई ठक्कर दियो।”
सीसीटीभी फुटेजमा देखिए अनुसार रजत रङको टोयोटा कोरोला ४२औं सडकतर्फ तीव्र गतिमा दौडिरहेको बेला स्टलमा ठोक्किएको र दुई जनालाई उडाएको थियो। त्यसपछि कार घुम्दै उत्तिकै दिशामा जाँदै गरेको भोल्भो सेडानमा ठोक्किएको प्रहरीको भनाइ छ।
८४ वर्षीय कार चालक र ७० वर्षीय पैदलयात्रीलाई अस्पताल पुर्याइए पनि दुबैको उपचारका क्रममा मृत्यु भयो। अर्को पीडित, ४२ वर्षीय जोआक्विन भेनेन्सियो, घटनास्थलमै मृत घोषित भए।
पीडितका दाजु एबेलार्डोले भने, “उहाँ सबैभन्दा राम्रो मान्छे हुनुहुन्थ्यो, दुई सन्तानलाई छोडेर जानुभयो। आज मेरो दाजु भए, भोलि अरू कोही हुन सक्छ। यहाँका सडकमा गाडी अत्यधिक गतिमा चल्छन्, यसलाई रोक्न उपाय चाहिन्छ।”
दुर्घटनाको कारणबारे प्रहरीले अनुसन्धान थालेको जनाएको छ।
