त्रिभुवन विमानस्थलमा ‘सेल्फी भिड’: यात्रुभन्दा भिजिटर बढी भएपछि ‘भिजिटर पास’ बन्द गरियो
काठमाडौं- त्रिभुवन अन्तर्राष्ट्रिय विमानस्थलले अनावश्यक भिडभाड र सुरक्षासम्बन्धी समस्याका कारण अन्तर्राष्ट्रिय टर्मिनलको लागि दिँदै आएको ‘भिजिटर पास’ मङ्गलवारबाट बन्द गरिदिएको छ।
भिजिटर पास दिने सुविधा अस्वाभाविक रूपमा धेरै व्यक्तिले प्रयोग गरी यात्रुको तुलनामा भिजिटरहरूको संख्या बढेपछि समस्या उत्पन्न भएको महाप्रबन्धक हंसराज पाण्डेले बताए। विशेषगरी राजनीतिक नेता र उच्चपदस्थ कर्मचारीहरूले पनि आफ्नो इच्छा अनुसार भिजिटर पास लिने प्रवृत्ति बढेपछि यस निर्णयमा पुगिएको हो।
यो कदमले विमानस्थलमा भएको अनावश्यक भिडभाड र चेक-इन प्रक्रियामा कठिनाइलाई नियन्त्रण गर्ने लक्ष्य राखिएको छ।
विमानस्थलमा वास्तविक आवश्यकताका आधारमा मात्र वृद्धवृद्धा, शारीरिक रूपमा असक्षम, गर्भवती र नाबालक यात्रुका लागि भिजिटर पास सुविधा जारी रहनेछ। आन्तरिक उडानहरूमा भने यस्तो बन्द गर्ने निर्णय अहिलेसम्म गरिएको छैन। यस निर्णयले विमानस्थलको सुरक्षा र सेवाप्रवाहमा सुधार हुने अपेक्षा गरिएको छ।
