न्यु ह्याम्पसायरमा सडक दुर्घटनामा पूर्व न्यूयोर्क सिटी मेयर रुडी गिलियानी घाइते

न्यूयोर्क – पूर्व न्यूयोर्क सिटी मेयर र डोनाल्ड ट्रम्पका पूर्व वकिल रुडी गिलियानी न्यु ह्याम्पसायरमा भएको सडक दुर्घटनामा घाइते भएका छन्। ८१ वर्षीय गिलियानीसँगै सवार भाडाको गाडीलाई शनिबार राति १९ वर्षीया युवतीले चलाएको कारले पछाडिबाट ठक्कर दिएको प्रहरीले जनाएको छ।

दुर्घटनामा गिलियानीको मेरुदण्ड भाँचिनुका साथै हात र खुट्टामा चोट लागेको छ। उनलाई नजिकैको ट्रमा सेन्टरमा भर्ना गरिएको र उपचार भइरहेको जनाइएको छ। गिलियानीका प्रवक्ता टेड गुडम्यान र उक्त युवती पनि सामान्य घाइते भएका छन्।

गिलियानीका सुरक्षा प्रमुख माइकल रागुसाले यो ‘निशाना बनाई गरिएको आक्रमण नभएको’ स्पष्ट गर्दै उनी ‘सकारात्मक मनोबलमा छिट्टै स्वस्थ हुँदैछन्’ भनेका छन्। दुर्घटना हुनु अघि गिलियानीले घरेलु हिंसाको पीडित एक महिलालाई देखेर प्रहरीलाई खबर गरेका थिए तर उक्त घटना र दुर्घटनाबीच कुनै सम्बन्ध नभएको प्रहरीले जनाएको छ।

गिलियानीका छोरा एन्ड्र्यु गिलियानीले सामाजिक सञ्जालमार्फत पिता चाँडै निको होस् भन्ने प्रार्थना गर्ने सबैप्रति आभार व्यक्त गरेका छन्।