सेन्ट्रल पार्क नजिक ट्राफिक बत्ती खस्दा ४ जना घाइते
न्युयोर्क- म्यानह्याटनको सेन्ट्रल पार्क पश्चिम र वेस्ट ८१औँ सडकको कुनामा शनिबार बिहान ट्राफिक बत्तीको पोल ढल्दा चार जना घाइते भएका छन्।
घटना बिहान करिब ११ बजे भएको हो। न्यूयोर्क सिटी फायर विभागका अनुसार घाइतेलाई तत्कालै स्वास्थ्यकर्मीहरूले उद्धार गरी करिब २० ब्लक उत्तरमा अवस्थित माउन्ट साइनाई मोर्निङसाइड अस्पताल पुर्याइएको छ।
घटनास्थलको भिडियोमा सडकको दुई लेन अवरुद्ध भएको र तारहरू सडकमा फैलिएको देखिन्थ्यो। मर्मत टोलीले बिग्रेको पोल हटाउँदै सडक खाली गर्ने काम गरिरहेको दृश्यसमेत देखिएको छ।
हालसम्म पोल ढल्नुको कारण स्पष्ट नभएको र घाइतेहरूको अवस्था कस्तो छ भन्नेबारे थप जानकारी दिइएको छैन।
