‘जेन जी’ आन्दोलनपछि प्रधानमन्त्री बनेकी सुशीला कार्कीका चुनौती र जिम्मेवारी
न्युयोर्क- ‘जेन जी’ आन्दोलनको मागअनुसार प्रधानमन्त्री बनेकी सुशीला कार्कीले कार्यालयसमेत जलेका सरकारी भवनबाहिर खोज्नुपर्ने चुनौतीपूर्ण अवस्थाबाट नेतृत्व सुरु गर्न लागेकी छिन्।
आन्दोलनकारीहरूले ६ महिनाभित्र निर्वाचन गराउन, संविधान संशोधनमार्फत प्रत्यक्ष निर्वाचित कार्यकारीको व्यवस्था गर्न, भ्रष्टाचार अनुसन्धानलाई स्वतन्त्र र निष्पक्ष बनाउन, भ्रष्ट नेताहरूको सम्पत्ति रोक्का राख्न, आन्दोलनमा मारिएका युवालाई शहीद घोषणा गर्न, घाइतेहरूको उपचार र दमनबारे छानबिन गर्नुपर्ने माग अघि सारेका छन्।
पूर्वप्रधानमन्त्री बाबुराम भट्टराईका अनुसार कार्कीको पहिलो काम शान्ति–सुव्यवस्था कायम गर्दै भ्रष्टाचार नियन्त्रण र सुशासन स्थापना गर्नु हुनेछ। उनले भौतिक क्षतिको पुनर्निर्माण, जनआक्रोशको सम्बोधन र पुराना दलप्रति अविश्वासबीच नयाँ राजनीतिक संरचनाको खोजलाई अन्तरिम प्रधानमन्त्रीको मुख्य दायित्व भनेका छन्।
तर संविधान संशोधन, दलहरूको स्वार्थ, भूराजनीतिक दबाब, कर्मचारीतन्त्रको निष्पक्षता र बिचौलियाको चलखेल जस्ता चुनौतीहरूको सामना गर्नुपर्ने देखिन्छ। जानकारहरूका अनुसार कार्कीले ‘जेन जी’ पुस्ताको विश्वास जित्न व्यावहारिक, पारदर्शी र समावेशी कदम चाल्नैपर्नेछ।
