युक्रेनसँगको द्वन्द्वका कारणहरूलाई सम्बोधनका लागि वार्ता गर्न तयार रहेको रूसी विदेश मन्त्रीको भनाइ
न्यूयोर्क- रूसी विदेश मन्त्री सर्गेई लाभ्रोभले रूस–युक्रेन द्वन्द्वका मूल कारण समाधान गर्न वार्ताका लागि आफूहरू तयार रहेको बताएका छन् ।
यूएनजीएको ८० औँ सत्रमा बोल्दै उनले रूसको सुरक्षासँगै युक्रेनमा रहेका रूसी जनता र रूसी भाषीहरूको अधिकार सुनिश्चित गर्नुपर्नेमा जोड दिए । मस्कोको अधिकार र चासोको सम्मान भएमा सुरक्षा ग्यारेन्टीबारे छलफल गर्न सकिने उनले उल्लेख गरे ।
उनका अनुसार द्वन्द्वले राष्ट्रहरूको सार्वभौमसत्ता र विश्वासलाई कमजोर पारेको छ । उनले सबै राष्ट्रलाई सैन्य शक्ति वा अर्थतन्त्र जस्तोसुकै भए पनि समान स्थान दिनुपर्ने आह्वान गरे ।
लाभ्रोभले पश्चिमी शक्तिले बल प्रयोग र धम्कीमार्फत अन्तर्राष्ट्रिय सिद्धान्त उल्लङ्घन गरेको आरोप लगाए । मध्यपूर्वमा इजरायलको कदम र कतार, यमन, लेबनान, सिरिया र इरानविरुद्धका आक्रामक गतिविधिले अस्थिरता बढाएको उनले बताए ।
अमेरिकासँगको सम्बन्धबारे उनले राष्ट्रपति पुटिन र डोनाल्ड ट्रम्पबीच अलास्का शिखर सम्मेलनपछि संवाद निरन्तरतामा आशा रहेको जनाए । रूस–अमेरिका दुवैले नयाँ युद्ध टार्न विशेष जिम्मेवारी बोकेका उनले उल्लेख गरे ।
संयुक्त राष्ट्र सुधार सन्दर्भमा लाभ्रोभले सुरक्षा परिषद्मा एशिया, अफ्रिका र ल्याटिन अमेरिकाको प्रतिनिधित्व बढाउनुपर्ने र सबै सदस्यको हित सुनिश्चित गर्दै पारदर्शी ढंगले काम गर्नुपर्नेमा जोड दिए ।
