गाजा सम्झौता कायम राख्न प्रधानमन्त्री नेतान्याहुसँगको भेटअघि राष्ट्रपति ट्रम्पलाई इजरायली बन्धक परिवारहरूको हार्दिक आग्रह
वासिङ्टन- गाजामा युद्ध अन्त्य गर्न अमेरिकी राष्ट्रपति डोनाल्ड ट्रम्पले अघि सारेको प्रस्तावित सम्झौतामा दृढ रहन इजरायली बन्धकका परिवारहरूले सोमबार अपिल गरेका छन् ।
प्रधानमन्त्री बेन्जामिन नेतान्याहुसँगको ह्वाइट हाउस भेट हुनु केही घण्टा अघि सार्वजनिक गरिएको खुला पत्रमार्फत होस्टेज एन्ड मिसिङ फेमिलिज फोरम नामक संस्थाले ट्रम्पलाई भनेको छ, “तपाईँले अघि सारेको सम्झौतालाई तोडफोड गर्ने प्रयासविरुद्ध दृढ रहन हामी आदरपूर्वक आग्रह गर्दछौँ । जोखिम ठूलो छ, हाम्रा परिवारले धेरै लामो समयदेखि प्रतीक्षा गरिरहेका छन् ।”
गत हप्ता संयुक्त राष्ट्र महासभाको साइडलाइनमा अरब तथा मुस्लिम नेताहरूसँगको छलफलपछि ट्रम्पले प्रस्तुत गर्नुभएको २१–बुँदे योजनाले युद्धविराम सम्भावना बलियो भएको थियो । यसै सन्दर्भमा परिवारहरूको अपिल सार्वजनिक भएको हो ।
फोरमले अघिल्ला वर्षभर नेतान्याहुमाथि युद्धविरामका प्रस्तावहरू तोडफोड गरेको र आफ्ना आफन्तहरूको रिहाइ अवरुद्ध गरेको आरोप लगाउँदै आएको छ । कतारमा हमास नेताहरूमाथि भएको इजरायली आक्रमणपछि समेत उनीहरूले भनेका थिए, “हरेक पटक सम्झौता नजिकिँदा नेतान्याहुले त्यसलाई तोडफोड गर्नुहुन्छ ।”
पत्रमा भनिएको छ, “तपाईँसँग मात्र यो सम्झौतालाई अन्तिम सीमामा पु¥याउने शक्ति छ । हाम्रो पक्षमा उभिनुभएकोमा हामी आभारी छौँ ।”
तर नेतान्याहुले भने पछिल्ला दिनहरूमा आशावादका कम सङ्केत दिएका छन् । संयुक्त राष्ट्र महासभामा उनले हमासविरुद्ध ‘काम समाप्त गर्ने’ प्रतिज्ञा गर्दै प्रमुख पश्चिमी मुलुकहरूले मान्यता दिएको प्यालेस्टिनी राज्यलाई रोकिने बताएका थिए । साथै, गाजा सहरमा जारी आक्रमण रोक्ने कुनै सङ्केत पनि देखाएका छैनन् ।
यसबीच, बन्धक परिवारहरूले ट्रम्पलाई नेतान्याहुमाथि युद्ध रोक्ने दबाब दिन आग्रह गर्दै भनेका छन्, “युद्ध अन्त्य गरेर सबै बन्धकलाई घर ल्याउने तपाईँको ध्यान इजरायलमा चलिरहेको युद्धसँग प्रत्यक्ष विपरीत छ । तर आफ्नो विश्वासमा अडिग रहनुभएकोमा हामी तपाईंलाई हार्दिक धन्यवाद दिन चाहन्छौँ ।”
