दसैँमा मासु स्वस्थ तरिकाले पकाएर खान चिकित्सकको सुझाव
काठमाडौं – दसैँमा घरघरमा बलि दिइने खसी–बोका, राँगा, च्याङ्ग्राजस्ता पशुको मासु खाने परम्परा छ। तर चिकित्सकहरूले मासु नखाने भन्दा पनि कसरी पकाएर खाने भन्नेमा ध्यान दिनुपर्ने सुझाव दिएका छन्।
फिजिसियन डा. भोजराज अधिकारीका अनुसार, खानपानमा लापरबाही गर्दा उच्च रक्तचाप, मधुमेह, मुटु तथा पेटसम्बन्धी समस्या बढ्ने गर्छ। उनले धेरै मासु एकैपटक पकाएर धेरै दिनसम्म खाने बानी छाड्न सुझाव दिँदै भने, “बोसो नभएको ताजा मासु थोरै थोरै गरेर खान सकिन्छ।”
डा. अधिकारीले मासु पोल्ने वा तार्ने बानी स्वास्थ्यका लागि हानिकारक हुने उल्लेख गर्दै, चाडपर्वमा नुन, चिल्लो, गुलियो र मदिरा–चुरोटको प्रयोगले समस्या झन् बढाउने बताए।
बिपी कोइराला मेमोरियल क्यान्सर अस्पतालका डा. गुरुशरण साहले रातो मासु धेरै पोल्दा वा तार्दा क्यान्सरको जोखिम बढ्ने चेतावनी दिएका छन्। उहाँले ताजा मासुसँगै सागसब्जी, गेडागुडी मिसाएर खाने र सकेसम्म माछा वा कुखुराको मासु रोज्न सुझाव दिए। वरिष्ठ क्यान्सर विशेषज्ञ डा. विनय ठाकुरले बोसो भएको मासु आगोमा पकाउँदा आन्द्रा क्यान्सरको खतरा बढी हुने बताएका छन्।
सिएमसीका डा. सौरभ खतिवडाले अस्वस्थ तरिकाले पकाइएको मासुले मोटोपना, मधुमेह, उच्च कोलेस्ट्रोल र अन्य समस्या ल्याउने बताए। उनका अनुसार, बोसोयुक्त मासुले रातभरि नै शरीरमा चिनीको मात्रा बढाइराख्ने जोखिम हुन्छ।
त्यस्तै, मुटुरोग विशेषज्ञ प्रा. डा. श्यामराज रेग्मीले मुटु रोगीले अत्यधिक चिल्लो र बोसोयुक्त मासु खान नहुने बताए। उनले भने, “चिल्लो, छाला र बोसो नभएको मासु थोरै खान सकिन्छ। स्वादको लागि थोरै खानुमा समस्या छैन।”
चिकित्सकहरूको साझा भनाइ छ—दसैँमा रमाइलो गर्ने मात्र नभई खानपानमा सचेत बन्ने हो भने उत्सव स्वस्थ र सुरक्षित बनाउन सकिन्छ।
