गाजामा युद्धविराम वार्तामा द्रुत प्रगति, अमेरिकी राष्ट्रपति ट्रम्पको भनाइ
वासिङ्टन- अमेरिकी राष्ट्रपति डोनाल्ड ट्रम्पले गाजा पट्टीमा युद्ध अन्त्य गर्न र कैदीहरूलाई मुक्त गर्न अमेरिका र हमासबीचको वार्तामा द्रुत प्रगति भइरहेको बताएका छन्।
ट्रम्पले सामाजिक सञ्जालमा लेख्दै वार्ता सफलतापूर्वक अगाडि बढिरहेको र सम्झौता अन्तिम चरणमा पुगेको जनाए। प्राविधिक टोलीहरू सोमबार इजिप्टमा पुनः भेट्ने अपेक्षा गरिएको छ।
सम्झौताको पहिलो चरण यसै हप्ता सुरु हुने उल्लेख गर्दै ट्रम्पले सबै पक्षलाई दुःख अन्त्य गरी शान्ति स्थापना गर्न छिटो अघि बढ्न आग्रह गरे।
उनका अनुसार २०-बुँदे अमेरिकी प्रस्तावमा शत्रुता अन्त्य, गाजाबाट इजरायली सेना फिर्ता गर्ने, र प्यालेस्टिनी कैदीहरूको सट्टामा इजरायली बन्धकहरूको रिहाइ समावेश छ।
ट्रम्पले हमासको प्रतिक्रियालाई स्वागत गर्दै भने, यो सम्झौताले इजरायलका लागि ठूलो उपलब्धि जनाउँछ। तर उनले चेतावनी पनि दिए — यदि हमासले शक्ति त्याग्न र गाजाको नियन्त्रण हस्तान्तरण गर्न अस्वीकार गर्यो भने, उसले “पूर्ण उन्मूलन” को सामना गर्नुपर्छ।
कतार, इजिप्ट र अमेरिकाको नेतृत्वमा गाजाको युद्ध अन्त्य, पुनर्निर्माण, र स्थायी स्थिरता स्थापना गर्न वार्ता अघि बढेको बताइएको छ।
