ट्रम्पले इन्सर्रेक्सन एक्ट लागू गर्ने सम्भावना!
वासिङटन -अमेरिकी राष्ट्रपति डोनाल्ड ट्रम्पले सोमबार भने कि यदि आवश्यक परेमा उनी १९औं शताब्दीको इन्सर्रेक्सन एक्ट लागू गर्ने विचारमा छन्। विशेष गरी यदि अदालत वा राज्य तथा स्थानीय अधिकारीहरूले उनीहरूको नेशनल गार्ड परिचालन योजना ढिला गरेमा उनी यस कदममा अघि बढ्न सक्ने बताए।
ट्रम्पले ओभल अफिसमा पत्रकारहरूसँग भने, “म आवश्यक परेमा यो गर्नेछु। अहिलेसम्म आवश्यक परेको छैन। तर यो एक्ट हाम्रो लागि छ। यदि मान्छे मारिँदै छन् र अदालत वा राज्यका गभर्नरहरूले ढिला गरिरहेका छन् भने म यो लागू गर्नेछु। हामीले हाम्रो सहर सुरक्षित बनाउनुपर्छ।”
इन्सर्रेक्सन एक्ट १८०७ ले राष्ट्रपतिलाई सीमित परिस्थितिमा अमेरिकी सेनालाई नागरिक कानून कार्यान्वयनमा परिचालन गर्ने अधिकार दिन्छ। यसलाई पछिल्लो पटक १९९२ का लस एन्जलस दंगामा प्रयोग गरिएको थियो।
ट्रम्पले आफ्नो टिप्पणीमा डेमोक्रेटले शासित सहरमा अपराध नियन्त्रण र सैनिक परिचालनको प्रयासको समर्थन गरेका छन्। उनले पोर्टल्याण्डमा लामो समयदेखि हिंसा भएको भन्दै त्यहाँको गतिविधिलाई “विद्रोह” भनिसकेका छन्।
पूर्व व्हाइट हाउस रणनीतिकार स्टीव ब्याननले पनि ट्रम्पले तुरुन्तै एक्ट लागू गरी पोर्टल्याण्ड र शिकागोमा सेनाको परिचालन गर्नुपर्ने आग्रह गरेका छन्।
डेमोक्रेट गभर्नरहरू ग्याभिन न्युसम (क्यालिफोर्निया) र जेबी प्रिट्जकर (इलिनोइस)ले ट्रम्पको नेशनल गार्ड योजना अस्वीकार गरेका छन्। प्रिट्जकरले सोमबार पत्रकार सम्मेलनमा ट्रम्पले तनाव सिर्जना गरेर इन्सर्रेक्सन एक्ट लागू गर्न पूर्वाधार तयार गर्दैछ भनी आरोप लगाएका छन्।
यसअघि ट्रम्पले पहिलो कार्यकालमा जर्ज फ्लोयडको मृत्युपछि मिनियापोलिसमा भएको प्रदर्शनमा इन्सर्रेक्सन एक्ट लागू गर्ने संकेत दिएका भए पनि अन्ततः लागू गरेका थिएनन्।
