आक्रमण जारी रहे अमेरिकाले हमासविरुद्ध सैन्य कारबाही गर्ने ट्रम्पको चेतावनी
वाशिङ्टन– अमेरिकी राष्ट्रपति डोनाल्ड ट्रम्पले चेतावनी दिएका छन् कि यदि लडाकु समूह हमासले गाजामा नागरिकमाथि आक्रमण जारी राख्यो भने, अमेरिका त्यसविरुद्ध सैन्य कारबाही गर्न बाध्य हुनेछ।
ट्रम्पले सामाजिक सञ्जालमा लेखेका छन्, “यदि हमासले मानवताविरुद्धका आक्रमण रोक्दैन भने, उनीहरूलाई मार्नु बाहेक हाम्रो विकल्प छैन।” यो चेतावनी उनले बाँकी रहेका मृत बन्धकहरूको खोजी र अमेरिकी मध्यस्थतामा भइरहेको शान्ति प्रयासमा ध्यान केन्द्रित गरेको भोलिपल्ट दिएका हुन्।
उनले भनेका छन्, “नागरिक र बन्धकमाथि हुने आक्रमणले मानवीय मर्यादामाथि चोट पुर्याउँछ, यस्तो व्यवहारले गम्भीर अमेरिकी प्रतिक्रिया निम्त्याउनेछ।” पत्रकारहरूसँग कुरा गर्दै ट्रम्पले शवहरूको खोजी र हस्तान्तरणको प्रक्रियालाई “जटिल र पीडादायी” भन्दै त्यसमा सबै पक्षले सहयोग गर्नुपर्ने बताए।
हतियारबारे बोल्दै उनले हमासलाई आफ्नो हतियारसहित आत्मसमर्पण गर्न आग्रह गरे। “यदि उनीहरूले नियम नमान्ने हो भने, निर्णायक अमेरिकी कदमका लागि तयार रहोस्,” ट्रम्पको चेतावनी थियो।
यो टिप्पणी उनले ह्वाइट हाउसमा अर्जेन्टिनाका राष्ट्रपति जेभियर मिलेसँगको भोजका क्रममा गरेका हुन्। भोजअघि अमेरिकाले अर्जेन्टिनाको अर्थतन्त्र स्थिर बनाउन २० अर्ब डलरको आर्थिक सहयोग प्याकेज घोषणा गरेको थियो।
ट्रम्पले अन्त्यमा भने, “हाम्रो लक्ष्य युद्ध होइन, शान्ति हो –तर शान्ति कायम राख्न कहिलेकाहीँ बल प्रयोग पनि आवश्यक हुन्छ।”
