न्युयोर्क मेयर दौड : माम्दानी अझै अगाडि, कुमो र स्लिवामाथि १६ अङ्कको अग्रता
न्युयोर्क – न्युयोर्क सिटीको मेयर चुनाव नजिकिँदै गर्दा डेमोक्रेटिक उम्मेदवार जोहरान माम्दानीले प्रतिद्वन्द्वी एन्ड्र्यू कुमो र कर्टिस स्लिवामाथि बलियो अग्रता कायम राखेका छन्।
म्यारिस्ट पोलले अक्टोबर २४ देखि २८ सम्म गरेको सर्वेक्षणअनुसार माम्दानीले सम्भावित मतदातामध्ये ४८ प्रतिशत समर्थन पाएका छन्। स्वतन्त्र उम्मेदवार एन्ड्र्यू कुमोले ३२ प्रतिशत र रिपब्लिकन उम्मेदवार कर्टिस स्लिवाले १६ प्रतिशत मत पाएका छन्।
यो सर्वेक्षणमा माम्दानीले अघिल्ला महिनाभन्दा उच्च समर्थन प्राप्त गरेका छन् भने कुमोको समर्थन स्तर लगभग स्थिर रहेको देखिएको छ।
तर, यदि चुनाव दुई उम्मेदवारबीच सीमित हुने हो भने – माम्दानी र कुमोबीचको अन्तर निकै घट्ने देखिएको छ। त्यस्तो अवस्थामा माम्दानीले ५१ प्रतिशत र कुमोले ४४ प्रतिशत मत पाउने सम्भावना देखिएको छ।
गत सेप्टेम्बरमा गरिएको म्यारिस्ट सर्वेक्षणमा माम्दानीले २१ अङ्कको अग्रता लिएका थिए। तर पछिल्ला सर्वेक्षणहरूले त्यो अन्तर केही घटेको देखाएका छन्।
यसअघि सफोक युनिभर्सिटीको पोलमा माम्दानीले ४४ प्रतिशत, कुमोले ३४ प्रतिशत र स्लिवाले ११ प्रतिशत समर्थन पाएका थिए। विश्लेषकहरूको भनाइमा स्लिवाका मतदाताहरू दोस्रो रोजाइमा कुमोलाई प्राथमिकता दिने भएकाले, उनीहरूको मत निर्णायक हुन सक्छ।
हाल न्युयोर्क सिटीमा अग्रिम मतदान सुरु भइसकेको छ र नोभेम्बर २ सम्म जारी रहनेछ। मुख्य मतदान नोभेम्बर ४, मंगलबार हुने कार्यक्रम छ।
