मेक्सिकोको सुपरमार्केट विस्फोटमा २३ जनाको निधन, धेरै नाबालिग पीडित
न्युयोर्क- मेक्सिकोको उत्तर भागमा रहेको एक सुपरमार्केटमा शनिबार भएको भीषण विस्फोटमा कम्तीमा २३ जनाको ज्यान गएको छ र ११ जना घाइते भएका छन् । प्रारम्भिक अनुसन्धानले ट्रान्सफर्मरमा भएको समस्या नै विस्फोटको कारण हुनसक्ने देखाएको छ ।
सोनोरा राज्यका गभर्नर अल्फोन्सो दुराजोले भिडियो सन्देशमार्फत भने, “दुःखको कुरा, धेरै पीडितहरू नाबालिग छन् । घाइतेहरूलाई हर्मोसिलो सहरका अस्पतालमा लगिएको छ ।”
उनले घटनाको कारण पत्ता लगाउन र दोषी पहिचान गर्न विस्तृत अनुसन्धानको आदेश दिएका छन् । अभियोजक कार्यालयले पनि यो आकस्मिक घटना भएको प्राथमिक धारणा बताएको छ र अनुसन्धान ट्रान्सफर्मरमा केन्द्रित गरिएको जनाएको छ ।
विस्फोट सहरको केन्द्रमा रहेको ‘वाल्डो’ सुपरमार्केटमा दिउँसो करिब २ बजेतिर भएको थियो । स्थानीय मिडियाका अनुसार विस्फोटपछि पसलभित्र रहेका केही ग्राहकहरू भाग्न नपाई आगोमा फसेका थिए । सार्वजनिक तस्बिरहरूमा भवनको अगाडिको भाग पूरै कालो देखिएको छ र झ्यालहरू फुटेका छन् ।
गभर्नर दुराजोले भने, “कसैले पनि यो पीडाको सामना एक्लै गर्नुपर्दैन । सुरु देखिनै आपतकालीन टोली र स्वास्थ्यकर्मीहरू पूर्ण प्रयासमा थिए र धेरै जीवन बचाउन सके ।”
मेक्सिकोकी राष्ट्रपति क्लाउडिया सेनबामले पनि सामाजिक सञ्जालमार्फत मृतकका परिवारप्रति समवेदना जनाइन् र घाइतेहरूको सहयोगका लागि टोली पठाउन निर्देशन दिइन् ।
अधिकारीहरूले नागरिकहरूलाई घटनास्थल नजिक नजान आग्रह गरेका छन् । सो क्षेत्रमा आयोजना हुन लागेको ‘डे अफ द डेड’ उत्सव पनि स्थगित गरिएको छ ।
स्थानीय अखबार एल युनिभर्सलका अनुसार नजिकका पसलहरूले आगो फैलिन नदिन ढोका बन्द गरेका थिए । अनुसन्धानकर्ताहरूले भवनमा प्रवेश अनुमति पाएपछि घटनाको ठ्याक्कै कारण पत्ता लाग्ने अपेक्षा गरिएको छ ।
