एन्ड्र्यु–एपस्टिन प्रकरणमा बेलायती शाही परिवारप्रति ‘नराम्रो’ महसुस भएको राष्ट्रपति ट्रम्पको अभिव्यक्ति
एयर फोर्स वन- अमेरिकी राष्ट्रपति डोनाल्ड ट्रम्पले बेलायती शाही परिवारका पूर्व राजकुमार एन्ड्र्यु र दिवङ्गत यौन अपराधी जेफ्री एपस्टिनबीचको सम्बन्धबारे दुःख प्रकट गरेका छन्। उनले यो घटनाका कारण बेलायती शाही परिवारप्रति नराम्रो महसुस भएको बताएका छन्।
एयर फोर्स वनमा पत्रकारसँग कुरा गर्दै ट्रम्पले भने, “यो परिवारका लागि निकै डरलाग्दो र दुःखद स्थिति हो। म उनीहरू प्रति सहानुभूति महसुस गर्छु।”
७९ वर्षीय ट्रम्प आफैं पनि एपस्टिनसँगको सम्भावित सम्बन्धका कारण आलोचनामा परिरहेका छन्। एपस्टिन सन् २०१९ मा जेलमा मृत भेटिएका थिए।
यो घटनाकै कारण बेलायती सरकारले पूर्व राजकुमार एन्ड्र्युको बाँकी भाइस–एडमिरल पद पनि खोस्ने तयारी गरेको बताइएको छ। राजा चार्ल्सले यसअघि नै उनलाई सबै शाही उपाधिबाट वञ्चित गरिसकेका छन्।
एन्ड्र्युमाथि किशोरीलाई यौन शोषण गरेको आरोप लगाइएको छ, जुन उनले अस्वीकार गर्दै आएका छन्। यो प्रकरण फेरि सतहमा आएपछि शाही परिवारमाथि जनआक्रोश बढ्दै गएको छ।
