जोहरन मम्दानी न्यूयोर्क सिटीका मेयर निर्वाचित, पहिलो मुस्लिम र अफ्रिकामा जन्मिने मेयर बने
न्यूयोर्क – डेमोक्रेटिक उम्मेदवार जोहरन मम्दानी न्यूयोर्क सिटीका नयाँ मेयर बनेका छन्। मंगलबार सम्पन्न चुनावमा ३४ वर्षीय मम्दानीले पूर्व गभर्नर एन्ड्रु कुमो र रिपब्लिकन उम्मेदवार कर्टिस स्लिवालाई पराजित गर्दै ऐतिहासिक जित निकालेका हुन्।
मम्दानीको जितले न्यूयोर्कको राजनीतिक इतिहासमा नयाँ अध्याय सुरु गरेको छ। उनी सहरका पहिलो मुस्लिम मेयर, पहिलो दक्षिण एसियाली मूलका तथा अफ्रिकामा जन्मिने पहिलो मेयर बनेका छन्। सहरको मेयरमा निर्वाचित हुने उनी पछिल्ला सय वर्षकै सबैभन्दा युवा नेता पनि हुन्।
राज्य सांसद रहेका मम्दानीले सहरलाई सबैका लागि “बाँच्न योग्य” बनाउनुपर्ने भन्दै सस्तो आवास, निःशुल्क सिटी बस सेवा र सामुदायिक सुरक्षामा सुधारजस्ता जनमुखी नारा अघि सारेका थिए। उनका आलोचकहरूले यी योजनाहरू कार्यान्वयन गर्न कठिन हुने बताएका छन्।
नतिजा अनुसार ५० वर्षयताकै उच्च मतदाता सहभागिता भएको यो चुनावमा दुई मिलियनभन्दा बढी न्यूयोर्कवासीले मतदान गरेका थिए।
अफ्रिकाको युगान्डामा जन्मिएका मम्दानी सानो उमेरमै परिवारसहित न्यूयोर्क आएका थिए। उनले सन् २०१८ मा अमेरिकी नागरिकता प्राप्त गरेका हुन्।
मम्दानीले अब जनवरी १ बाट मेयरको रूपमा कार्यभार सम्हाल्नेछन्। उनीमाथि आफ्नो महत्वाकांक्षी एजेन्डा कार्यान्वयन गर्ने र संघीय सरकारसँगको सम्बन्ध व्यवस्थापन गर्ने ठूलो चुनौती रहनेछ।
