सुपर टाइफुन ‘फङ–वोङ’ : फिलिपिन्समा १० लाख विस्थापित
मनिला- यस वर्षको सबैभन्दा शक्तिशाली आँधी सुपर टाइफुन ‘फङ–वोङ’ (उवान) फिलिपिन्सको उत्तर–पूर्वी तटमा प्रहार गर्दै देशभर विनाशकारी हावा र मुसलधारे वर्षा ल्याएको छ। करिब १० लाख नागरिकलाई सुरक्षित स्थानमा सारिएको छ भने धेरै क्षेत्रमा बिजुली र सञ्चार अवरुद्ध भएका छन्।
राष्ट्रपति फर्डिनान्ड मार्कोस जुनियरले आपतकाल घोषणा गरेका छन्। मौसम विभागका अनुसार १८५ किलोमिटर प्रतिघण्टाभन्दा बढी वेगको हावा र २३० किलोमिटर प्रतिघण्टासम्मका झोकासहित आँधी अरोरा वा इसाबेला प्रान्ततर्फ सर्दैछ।
तीन करोडभन्दा बढी मानिस प्रत्यक्ष खतरामा पर्न सक्ने अनुमान गरिएको छ। विद्यालय, कार्यालय र सयौँ उडान रद्द भएका छन् भने बन्दरगाहमा हजारौँ यात्रु अलपत्र परेका छन्। अधिकारीहरूले उच्च जोखिम क्षेत्रका बासिन्दालाई तुरुन्तै सुरक्षित स्थानमा जान आग्रह गरेका छन्।
