सरकारी बन्दका कारण अमेरिकी एयरलाइन्सका दुई हजार ५०० भन्दा बढी उडान रद्द, यात्रुहरू समस्यामा
वासिङ्टन- अमेरिकामा जारी सरकारी बन्दका कारण हवाई सेवा व्यापक रूपमा प्रभावित भएको छ। सङ्घीय उड्डयन प्रशासन (एफएए) ले हवाई यातायात घटाउने आदेश दिएपछि सप्ताहन्तभर अमेरिकी एयरलाइन्सहरूले दुई हजार ५०० भन्दा बढी उडान रद्द गरेका छन्।
देशका प्रमुख विमानस्थलहरूमा यात्रुहरू अलमलमा परेका छन्। नियन्त्रकहरू तलब बिना लामो समयदेखि काम गर्न बाध्य भएकाले अभाव बढेको छ। यात्रुहरू पुनः बुकिङका लागि लामो प्रतीक्षामा छन् भने वैकल्पिक यात्रा विकल्प रोज्न थालेका छन्।
विशेषज्ञहरूले उडान अवरोधले पर्यटन, कार्गो ढुवानी र समग्र अर्थतन्त्रमा नकारात्मक असर पार्ने चेतावनी दिएका छन्। सरकारी बन्द जारी रहेसम्म समस्या अझ गहिरिँदै जाने अनुमान गरिएको छ।
