अमेरिकी सरकारको लामो शटडाउन अन्त्यतर्फ, स्टपग्याप विधेयक प्रतिनिधि सभातर्फ
वासिङटन- अमेरिकाको इतिहासकै सबैभन्दा लामो शटडाउन अन्त्यतर्फ अघि बढ्दै गएको छ। सोमबार सिनेटमा स्टपग्याप कोष विधेयक ६०–४० मतले पारित भएपछि अब देश पुनः सञ्चालनमा फर्किने आशा देखिएको छ।
यो विधेयकलाई समर्थन गर्न केही डेमोक्रेटिक सिनेटरहरूले पार्टीको रेखा तोड्दै रिपब्लिकनहरूसँग मत दिएका थिए। अब यो विधेयक प्रतिनिधि सभामा पठाइनेछ, जहाँ रिपब्लिकनहरूको नियन्त्रण छ।
अक्टोबर १ बाट सुरु भएको शटडाउनका कारण करिब दश लाख संघीय कामदार बेतलबी बनेका थिए र सरकारी सेवा अवरुद्ध भएका थिए। हवाई यातायातमा गम्भीर असर परेपछि दैनिक हजारभन्दा बढी उडान रद्द हुँदा राजनीतिक दबाब झनै बढेको थियो।
राष्ट्रपति डोनाल्ड ट्रम्पले ओभल अफिसमा पत्रकारहरूसँग कुरा गर्दै “हामी हाम्रो देशलाई अब धेरै चाँडै पुनः खोल्नेछौँ” भन्दै सम्झौताप्रति सन्तोष व्यक्त गरे। सिनेटका बहुमत नेता जोन थुनले पनि “अनावश्यक शटडाउनलाई जिम्मेवार तरिकाले अन्त्य गर्न पाउँदा सन्तुष्ट छु” भन्दै संघीय कामदारलाई तुरुन्तै भुक्तानी हुने बताए।
सिनेटबाट पारित विधेयक बुधबार प्रतिनिधि सभामा छलफल हुने अपेक्षा गरिएको छ। सभामुख माइक जोनसनले “हाम्रो लामो राष्ट्रिय दुःस्वप्न अन्त्य हुने क्रममा छ” भन्दै रिपब्लिकन र राष्ट्रपति ट्रम्पले हप्तौँदेखि आग्रह गर्दै आएको कुरा अब डेमोक्रेटहरूले पनि स्वीकार गरेको बताए।
शटडाउनको प्रमुख कारण स्वास्थ्य बीमा कार्यक्रम ‘ओबामाकेयर’ सम्बन्धी अनुदान विस्तार हो। डेमोक्रेटहरूले बीमा अनुदानलाई निरन्तरता दिन माग गरेका थिए, तर रिपब्लिकनहरूले सरकार खुलाएपछि मात्र वार्ता गर्न सकिने अडान लिएका थिए। यदि अनुदान विस्तार भएन भने लाखौँ अमेरिकीको बीमा खर्च दोब्बर हुन सक्छ।
सम्झौताअनुसार सरकार जनवरीसम्म पुनः सञ्चालन हुनेछ। केही कार्यक्रम पूरै आर्थिक वर्षका लागि वित्तपोषित हुनेछन् र SNAP खाद्य सहायता कार्यक्रमको कोष पुनःस्थापित हुनेछ।
सम्झौता समर्थन गर्ने सिनेटर जीन साहिनले “सिनेटले लाखौँ अमेरिकीको स्वास्थ्य हेरचाह सुरक्षित गर्ने दिशामा ठूलो कदम चालेको छ” भनेकी छन्। तर स्वास्थ्य बीमा अनुदान विस्तारको सुनिश्चितता नभएकाले धेरै डेमोक्रेटहरू असन्तुष्ट बनेका छन्।
क्यालिफोर्नियाका गभर्नर गेभिन न्युसमले यसलाई “दयनीय निर्णय” भनेका छन् भने सिनेटका शीर्ष डेमोक्रेट चक शुमरले “यो प्रस्तावले स्वास्थ्य सेवा संकटलाई समाधान गर्न सक्दैन” भन्दै अस्वीकार गरेका छन्। पार्टीभित्र नेतृत्वबारे असन्तुष्टि बढ्दै गएको छ।
