हसिनालाई भारतसँग सुपुर्दगी गर्न बङ्गलादेशको माग

ढाका- बङ्गलादेशले अपदस्थ पूर्वप्रधानमन्त्री शेख हसिनालाई मानवताविरुद्धको अपराधमा मृत्युदण्डको सजाय सुनाइएपछि भारतसँग सुपुर्दगी गर्न माग गरेको छ। हसिना सन् २०२४ अगस्टको जनविद्रोहपछि पदच्युत भई भारतको नयाँदिल्लीमा शरण लिएको अनुमान गरिएको छ।

ढाकाको विशेष अदालतले हसिना र पूर्व गृहमन्त्री असदुज्जमान खान कमललाई अनुपस्थितिमै मृत्युदण्डको सजाय सुनाएको थियो। बङ्गलादेशले भारतमा उनीहरू रहेको दाबी गर्दै तत्काल सुपुर्दगीको माग गरेको छ। विदेश मन्त्रालयले दोषीलाई शरण दिनु ‘न्यायको अपमान’ हुने चेतावनी दिएको छ।

भारतले भने बङ्गलादेशको फैसलालाई ध्यान दिएको बताउँदै शान्ति, लोकतन्त्र र स्थिरताप्रति आफ्नो प्रतिबद्धता दोहोर्याएको छ।

हसिनाको १५ वर्षे शासनकालमा व्यापक मानवअधिकार उल्लङ्घन भएको आरोप छ, जसमा राजनीतिक विरोधीहरूको सामूहिक हिरासत र गैरन्यायिक हत्या समावेश छन्। बङ्गलादेशले इन्टरपोलमार्फत ‘अत्यन्त खोजी’ सूचना जारी गरेको दाबी गरे पनि विश्वव्यापी सूचीमा उनको नाम दर्ता नभएको बताइएको छ।

अन्तरिम सरकारका नेता मोहम्मद युनुसले अदालतको फैसलालाई ‘ऐतिहासिक’ भन्दै स्वागत गरेका छन् र सार्वजनिक व्यवस्था भंग नगर्न नागरिकलाई आग्रह गरेका छन्।