न्यूयोर्कमा गोलीकाण्ड : प्रहरी घाइते, अभियुक्तको मृत्यु
न्यूयोर्क- न्यूयोर्कको ब्रुकलिनमा सोमबार भएको घटनामा एक प्रहरी अधिकारीको अनुहारमा शटगनबाट चलाइएको गोली (बर्डशट पेलेट) लाग्दा घाइते भएका छन्। गोली चलाउने २५ वर्षीय हत्या अभियुक्त भने क्रसफायरमा मारिएका छन्।
एनवाइपीडी कमिश्नर जेसिका टिसका अनुसार घटनास्थलमा प्रारम्भिक रूपमा एक व्यक्तिको शव भेटिएको थियो। त्यसपछि दुई प्रहरी घटनास्थल सुरक्षित गर्न बसेका थिए। करिब दुई घण्टापछि एक अपार्टमेन्टको ढोकाबाट शटगन चलाइँदा प्रहरी अधिकारी शरजिल वारिस घाइते भए।
प्रहरीले जवाफी गोली चलाएपछि अभियुक्त अपार्टमेन्टभित्रै बारिकेड भएर बसे। पछि आपतकालीन सेवा टोलीले झ्याल तोडेर ड्रोन पठाउँदा उनलाई भान्साको भुइँमा मृत अवस्थामा भेटियो। छेउमै शटगन पनि थियो। प्रारम्भिक अनुमान आत्महत्या भए पनि अनुसन्धानले त्यसको पुष्टि गरेको छैन।
घाइते प्रहरी वारिस ७३औँ प्रिसिन्क्टमा कार्यरत चार वर्षे अनुभव भएका अधिकारी हुन्। उनी उपचारपछि सामान्य अवस्थामा रहेको जनाइएको छ।
उपमहापौर रान्डी मास्ट्रोले घाइते प्रहरी र उनका परिवारको अवस्था ठिक रहेको बताए। अन्य दुई प्रहरी भने घटनास्थलतर्फ जाँदै गर्दा सवारी दुर्घटनामा परे पनि उनीहरू पनि सुरक्षित रहेको जनाइएको छ।
कमिश्नर टिसले भने, “आजको घटना देखाउँछ कि यो शहरलाई सुरक्षित राख्ने प्रहरीहरू कति छिटो जोखिममा पर्छन्। उनीहरूले आफ्नो काम गरे र फेरि एकपटक जनतालाई सुरक्षित राखे।”
