संवादतर्फ ट्रम्पको झुकाव : मम्दानीसँग मिल्ने तयारी

न्यूयोर्क- अमेरिकी राष्ट्रपति डोनाल्ड ट्रम्पले आइतबार न्यूयोर्क शहरका नवनिर्वाचित मेयर जोहरान मम्दानीसँग भेट हुने संकेत दिएका छन्। उनले “केही मिलाउँछौं” भन्दै सम्भावित सहकार्यको सम्भावना व्यक्त गरेका छन्।

ट्रम्पले विगत केही महिनादेखि मम्दानीलाई ‘कम्युनिस्ट’ भन्दै आलोचना गर्दै आएका थिए। उनले मम्दानीलाई निर्वासनमा पठाउने धम्कीसमेत दिएका थिए। तर मम्दानीले प्रगतिशील नीतिहरू र ट्रम्पको आप्रवासी विरोधी एजेन्डाविरुद्ध अभियान चलाउँदै लोकप्रियता हासिल गरेका थिए।

३४ वर्षीय मम्दानीले पूर्व गभर्नर एन्ड्र्यु कुओमोलाई करिब ९ प्रतिशतले पराजित गर्दै मेयर बनेका हुन्। विजय भाषणमा उनले न्यूयोर्कलाई राष्ट्रपति विरुद्धको प्रतिरोधको प्रतीक बनाउन चाहेको बताए। तर अर्को दिन उनले “न्यूयोर्कलाई ट्रम्प–प्रूफ” बनाउने योजनासँगै आवश्यक परे राष्ट्रपति सहित सबैसँग काम गर्न तयार रहेको बताएका थिए।

ट्रम्पले भने, “न्यूयोर्कका मेयर हामीसँग भेट्न चाहन्छन्। हामी केही मिलाउँछौं।” प्रेस सचिव करोलिन लेभिटले यसबारे स्पष्ट गर्दै भेटको मिति तय नभएको जनाइन्।

यसैबीच ट्रम्पले भेनेजुएलाका राष्ट्रपति निकोलस मदुरोसँग पनि सम्भावित वार्ता हुने संकेत दिएका छन्। उनले भने, “म सबैसँग कुरा गर्छु।”