ट्रम्पद्वारा समर्थित २८–बुँदे युक्रेन शान्ति योजना सार्वजनिक
वासिङटन- अमेरिकी राष्ट्रपति डोनाल्ड ट्रम्पले समर्थन गरेको २८–बुँदे शान्ति योजनाको मस्यौदा सार्वजनिक भएको छ। यस योजनामा युक्रेनले रुसलाई निश्चित क्षेत्रीय तथा सुरक्षा सम्बन्धी छुटहरू दिनुपर्ने प्रावधान राखिएको छ। योजनाअनुसार रुसलाई पुनः जी–८ समूहमा फर्काइनेछ र विभिन्न प्रतिबन्धहरू चरणबद्ध रूपमा हटाइनेछन्।
ह्वाइट हाउसका प्रेस सचिव क्यारोलिन लेविटका अनुसार राष्ट्रपति ट्रम्पका विशेष दूत स्टिभ विटकफ र विदेशमन्त्री मार्को रुबियोले करिब एक महिनादेखि यस योजनामा ‘शान्त तर सक्रिय’ रूपमा काम गरिरहेका थिए। युक्रेनी राष्ट्रपति भोलोदिमिर जेलेन्स्कीले आगामी दिनमा ट्रम्पसँग छुट्टै संवादमार्फत योजनाबारे छलफल गर्ने अपेक्षा व्यक्त गरेका छन्।
मस्यौदामा युक्रेनको सार्वभौमिकता पुनः पुष्टि गर्ने, रुस–युक्रेन–युरोपबीच गैर–आक्रमण सम्झौता गर्ने, नाटो विस्तार रोक्ने, युक्रेनलाई दीर्घकालीन सुरक्षा ग्यारेन्टी दिने, रुसलाई विश्व अर्थतन्त्रमा पुनः एकीकृत गर्ने, कैदी आदान–प्रदान तथा मानवीय कार्यक्रम सञ्चालन गर्ने लगायतका प्रावधानहरू समावेश छन्।
योजनामा क्रिमिया, लुहान्स्क र डोनेट्स्कलाई रूसको रूपमा मान्यता दिने, युक्रेनमा १०० दिनभित्र आम निर्वाचन गराउने, द्वन्द्वमा संलग्न सबै पक्षलाई माफी दिने, र युद्धविराम लागू गर्ने व्यवस्था पनि गरिएको छ।
यस शान्ति योजनाको सफल कार्यान्वयन दुवै पक्षको सहमति र कूटनीतिक प्रगतिमा निर्भर रहने बताइएको छ।
