हङकङमा भीषण आगलागी, ५५ जनाको मृत्यु

हङकङ- हङकङको उत्तरी जिल्लास्थित वाङ फुक कोर्टमा बुधबार दिउँसो भीषण आगलागी हुँदा कम्तीमा ५५ जनाको मृत्यु भएको छ। ३१ तले आवासीय ब्लकमा मर्मतसम्भार कार्य भइरहेका बेला बाँकी रहेको ज्वलनशील सामग्रीका कारण आगो तीव्र गतिमा फैलिएको बताइएको छ। प्रहरीले गम्भीर लापरवाही गरेको आरोपमा तीन जनालाई पक्राउ गरेको छ।

आगो नियन्त्रणमा लिन अग्नि नियन्त्रकहरू निरन्तर प्रयासरत रहे पनि उद्धार कठिन बनेको छ। मृतकमध्ये एक ३७ वर्षीय अग्नि नियन्त्रक पनि रहेका छन्। ५६ जना घाइतेको उपचार भइरहेको छ, जसमा केहीको अवस्था गम्भीर छ। प्रारम्भिक अनुमानअनुसार करिब २७९ जनासम्म बेपत्ता छन् भने ९०० भन्दा बढी बासिन्दाले अस्थायी आश्रय लिनुपरेको छ।

प्रत्यक्षदर्शीहरूले आगो अचानक फैलिँदा धुवाँ र खरानी आकाशसम्म उडेको, मानिसहरू आतङ्कमा भागिरहेको र उद्धार टोलीले कठिन परिस्थितिमा काम गरिरहेको बताएका छन्। घटनास्थलको ताप अत्यन्तै उच्च भएकाले केही तलासम्म पुग्न कठिन भएको फायर सर्भिसले जनाएको छ।

चिनियाँ राष्ट्रपति सी जिनपिङले मृतक तथा घाइतेप्रति समवेदना व्यक्त गरेका छन् भने सहरका नेता जोन लीले प्रभावित बासिन्दालाई आवश्यक सहयोग उपलब्ध गराइने आश्वासन दिएका छन्। आसपासका ब्लक खाली गरिएका छन्, राजमार्गका केही भाग बन्द गरिएका छन् र ठूलो संख्यामा राहत टोली परिचालन गरिएको छ।

यस दुर्घटनाले हङकङलाई पुनः शोकमा डुबाएको छ।