इन्टरपोलको अध्यक्षमा फ्रान्सेली प्रहरी नियन्त्रक लुकास फिलिप नियुक्त
रबात- मोरक्कोमा सम्पन्न ९३ औँ सम्मेलनमा फ्रान्सेली प्रहरी नियन्त्रक लुकास फिलिप इन्टरपोलको नयाँ अध्यक्ष चुनिएका छन्। उनले विवादास्पद इमिराती अधिकारी अहमद नासिर अल–राइसीको स्थान लिएका हुन्, जसविरुद्ध यातनालाई प्रश्रय दिएको आरोपमा यूरोपमा धेरै उजुरी दर्ता भएका थिए।
५३ वर्षीय फिलिपले ८४ मत प्राप्त गर्दै टर्किस उम्मेदवार मुस्तफा सेर्कान साबान्कालाई पराजित गरे। अन्य प्रतिस्पर्धी नामिबियाकी एनी मेरी नैन्डा र इथियोपियाकी डेमेलास गेब्रेमिचेल वेल्डेसले क्रमशः १२ र ८ मत पाए।
फिलिपले आफ्नो उद्देश्य इन्टरपोललाई विश्वव्यापी सामूहिक सुरक्षाको सन्दर्भमा अझ सुदृढ बनाउने रहेको बताए। इन्टरपोलको अध्यक्ष पद चार वर्षका लागि प्रतीकात्मक भए पनि यसको मुख्यालय फ्रान्सको लियोनमा रहेको छ र दैनिक काम महासचिवले सञ्चालन गर्छन्। हाल ब्राजिलियन वाल्डेसी उक्र्विजा महासचिवको जिम्मेवारी सम्हालिरहेका छन्।
इन्टरपोलका अध्यक्षहरू विगतमा पनि विवादमा तानिएका छन्। पूर्व अध्यक्ष मेङ होङवेईलाई चीनले भ्रष्टाचारको आरोपमा सन् २०२० मा १३ वर्षभन्दा बढी जेल सजाय सुनाएको थियो।
