ट्रम्पद्वारा ‘तेस्रो विश्व’ आप्रवासन स्थगित गर्ने घोषणा
वासिङ्टन- वासिङ्टनमा एक अफगान नागरिकले दुई जना नेशनल गार्डमाथि गोली प्रहार गरी एक जनाको हत्या गरेपछि अमेरिकी राष्ट्रपति डोनाल्ड ट्रम्पले बिहीबार तीव्र प्रतिक्रिया दिएका छन। उनले ‘तेस्रो विश्वका देशहरू’बाट हुने आप्रवासन स्थायी रूपमा रोक्ने घोषणा समेत गरे।
यो कदम उनको दोस्रो कार्यकालमा अघि बढाइरहेको आप्रवासन–विरोधी नीतिको अर्को कठोर मोड बनेको छ। उनले सामाजिक सञ्जालमा लेख्दै बाइडेन प्रशासनमा स्वीकृत ‘लाखौँ प्रवेश’ खारेज गर्ने र अमेरिकाका लागि योगदान नबन्ने व्यक्तिहरूलाई हटाउने चेतावनी समेत दिए।
बुधबारको घटनामा वेस्ट भर्जिनियाबाट वासिङ्टनमा तैनाथ २० वर्षीया साराह बेकस्ट्रोमको मृत्यु भयो भने अर्का सैनिक एन्ड्र्यु वोल्फ गम्भीर घाइते भए। गोली चलाएको आरोपमा २९ वर्षीय अफगान नागरिक रहमानुल्ला लकानवाल पक्राउ परे। एफबिआईले यसलाई अन्तर्राष्ट्रिय आतङ्कवादी आक्रमणको आशङ्का गर्दै अनुसन्धान सुरु गरेको छ।
युएस सिटिजनसिप एन्ड इमिग्रेशन सर्भिसका निर्देशक जोसेफ एडलोले जानकारी दिए कि ट्रम्पको आदेशअनुसार अफगानिस्तान, क्युबा, हाइटी, इरान, म्यान्मारलगायत १९ देशका ग्रीन कार्डधारीहरूको पुनः कठोर छानबिन सुरु गरिएको छ। यीमध्ये धेरै देश पहिले नै ट्रम्प प्रशासनको यात्रा प्रतिबन्ध सूचीमा परेका थिए।
यस घटनाले अमेरिकी राजधानीमा सुरक्षा, आप्रवासन नीति र अफगान युद्धको दीर्घकालीन प्रभावबारे पुनः बहस चर्काएको छ। घटनापछि वासिङ्टनमा थप ५०० सैनिक तैनाथ गरियो, जसले कुल सङ्ख्या २,५०० पुर्यायो। ट्रम्पले अन्य सहरहरूमा पनि सेना पठाउने घोषणा गरे, जसले संघीय सत्ता दुरुपयोग र अधिनायकवादी हस्तक्षेपबारे आलोचना बढायो।
