बेलायतमा आप्रवासनमा भारी गिरावट : ६९ प्रतिशतले कमी
लन्डन- जुन महिनासम्मको एक वर्षमा आप्रवासनका लागि बेलायत पुग्ने व्यक्तिको सङ्ख्या ६९ प्रतिशतले घटेको छ। राष्ट्रिय तथ्याङ्क कार्यालयका अनुसार काम र अध्ययनका लागि आउने गैर–युरोपेली नागरिक र उनीहरूका आश्रितहरूको सङ्ख्या कम हुनु, साथै बेलायती नागरिकहरूको बसाइँसराइ बढ्नु यस गिरावटको प्रमुख कारण हो।
प्रधानमन्त्री किअर स्टार्मरको सरकारका लागि यो तथ्याङ्क स्वागतयोग्य मानिएको छ। लेबर सरकार आप्रवासन नीतिमा दबाबको सामना गरिरहेको बेला यस्तो गिरावट सार्वजनिक भएको हो। विपक्षी कन्जरभेटिभहरूले भने यसलाई पूर्वप्रधानमन्त्री ऋषि सुनकले लागू गरेका भिसा, आश्रित र विद्यार्थीसम्बन्धी सुधारहरूको परिणाम भएको दाबी गरेका छन्।
तथ्याङ्कअनुसार जुनसम्म करिब ८ लाख ९८ हजार मानिस बेलायत भित्रिएका थिए भने ६ लाख ९३ हजार स्थायी रूपमा बाहिरिएका थिए। यो सन् २०२१ यताको सबैभन्दा कम स्तर हो।
तर अनियमित आप्रवासन भने अझै घटेको छैन। यस वर्ष मात्र साना डुङ्गामार्फत ३९ हजारभन्दा बढी मानिस बेलायत पुगेका छन्, जुन सन् २०२४ को पूरै वर्षको भन्दा बढी हो।
गृहमन्त्री शाबना महमूदले कानुनी र अवैध दुवै आप्रवासनमाथि कडा कारबाही गर्ने घोषणा गरे। सरकारले फ्रान्ससँग सहमति भएको ‘एक भित्र, एक बाहिर’ योजनामा पनि आशा राखेको छ। यस योजनाअन्तर्गत हालसम्म १५३ जनालाई फ्रान्स फिर्ता पठाइएको छ भने १३४ जनालाई कानुनी मार्गमार्फत बेलायत प्रवेश दिइएको छ।
